Փաստ ինֆո

Ադրբեջանի ԶՈՒ-երի կողմից գերեվարված հայ գյուղացի՝ 84-ամյա Միշա Մելքումյանի դին կենթարկվի դատաբժշկական փորձաքննության։

Ինչպես արդեն տեղեկացրել ենք՝ հոկտեմբերի 29-ի լույս 30-ի գիշերը մահացել է Ադրբեջանի զինված ուժերի կողմից գերեւարված հայ գյուղացի՝ 84-ամյա Միշա Մելքումյանը։ Նախնական պայմանավորվածության համաձայն՝ ԿՄԽԿ-ի միջնորդությամբ, նրան պետք է տեղափոխեին, սակայն առողջական վիճակի պատճառով, առաջարկվել է թողնել նրան մի որոշ ժամանակով՝ մինչև մի փոքր լավանա, սակայն, ցավոք, նա մահացել է։ Նրա աճյունը հայկական կողմին է փոխանցվել նոյեմբերի 1-ին, իսկ այսօր Արցախի մարդու իրավունքների պաշտպան Արտակ Բեգլարյանը հայտնել էր, որ գերության մեջ մահացած 84-ամյա Միշա Մելքումյանն Ադրբեջանում ենթարկվել է խոշտանգումների։

ՀՀ ՔԿ հասարակայնության հետ կապերի և տեղեկատվության բաժնի պետ Ռիմա Եգանյանը «Փաստինֆո»-ի հարցմանն ի պատասխան հայտնեց, որ ՀՀ քննչական կոմիտեի զինվորական քննչական գլխավոր վարչության 6-րդ կայազորային քննչական բաժնի ծառայողները, պետի գլխավորությամբ, եղել են սահմանային անցակետում, մասնակցել են Միշա Մելքումյանի դիակի փոխանցման գործընթացին, այնուհետև տեղում, դատաբժշկական փորձագետի մասնակցությամբ, արտաքին զննության են ենթարկել դին, որից հետո նշանակվել է դատաբժշկական փորձաքննություն և դիակի դատաբժշկական փորձաքննություն։

Ավելի վաղ տեղեկացրել ենք, որ ԿՄԽԿ միջնորդությամբ հակառակորդը հայկական կողմին է փոխանցել 29 զինծառայողի դի և 1 քաղաքացիական անձ։ Նշված դիակների փոխանցման ընթացքում՝ սահմանային անցակետում ներկա են եղել նաև ՔԿ ծառայողները և դատաբժշկի ներկայությամբ զննություն է իրականացվել՝ հենց տեղում։ Բացի արտաքին զննությունից, դիակի դատաբժշկական փորձաքննությունն իրականացվում է դիահերձարանում։

Հիշեցնենք, որ սեպտեմբերի 27-ին Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում է նաեւ Թուրքիան, վարձկան-ահաբեկիչներ՝ Սմերչ, Պոլոնեզ, թուրքական Կասիրգա եւ այլ զինատեսակներով հրթիռակոծելով խաղաղ բնակավայրերը, այդ թվում մայրաքաղաք Ստեփանակերտը։ ՀՀ ԱԳՆ-ն հայտարարել է, որ Արցախի ժողովուրդը մարտնչում է թուրք-ադրբեջանական դաշինքի դեմ ու ընդգծել՝ Թուրքիան հավաքագրում է օտարազգի ահաբեկիչ զինյալների և տեղափոխում նրանց Ադրբեջան։

Հայաստանում եւ Արցախում սեպտեմբերի 27-ին հայտարարվել է ռազմական դրություն և ընդհանուր զորահավաք։

Անցած մեկ ամսվա ընթացքում երեք անգամ ձեռք է բերվել հումանիտար հրադադարի վերաբերյալ պայմանավորվածություն՝ մարտական գործողությունների տարածքից դիակները տեղափոխելու, ռազմագերիների փոխանակման համար, սակայն Ադրբեջանը դրանք մշտապես խախտել է։

Հեղինակ՝ Իզաբել Սահակյան

Աղբյուր` Փաստինֆո