Փաստ ինֆո

ՀՀ քննչական կոմիտեն տեսանյութ է հրապարակել՝ գերեվարված վարձկան ահաբեկչի հարցաքննությունից։ Հարցաքննության ժամանակ Յուսեֆ Ալաբեթ Ալ Հաջին պատմել է, որ իրեն հավաքագրել է հարաևան գյուղի բնակիչ Իբրահիմը, որին Աբու Ահմադ էին անվանում։ Վերջինս առաջարկել է գումարի դիմաց գնալ Ադրբեջան՝ ամսական 2 հազար ԱՄՆ դոլարի դիմաց զորավարժությունների մասնակցելու։

«Իմ ընտանիքի անդամները՝ կինս, հայրս, դեմ էին, որ ես գնայի, եղբայրներս տեղյակ չէին այդ մասին։ Աբու Ահմադն ասաց, որ ուրիշ երիտասարդներ էլ կան՝ հարևան գյուղերից, որոնց մի մասն արդեն մեկ ամիս է, ինչ գտնվում են Ադրբեջանում։ Աբու Ահմադն ինձ ասել է, որ ինձ հետ ոչինչ չվերցնեմ, այդ թվում՝ անձը հաստատող փաստաթուղթ կամ այլ իր»,- ասաց նա։

Ալ Հաջիի խոսքով՝ մարդատար մեքենայով տեղափոխվել են անցակետ, որը գտնվում է Աբու Համշայի հսկողության տակ, անցակետում հավաքված են եղել 500 անձ, որոնք բոլորը սիրիացի արաբներ էին։

«Առավոտյան ժամը 8-ին այնտեղ է եկել Աբու Համշայի եղբայրը, ում անունը Սեյֆ էր։ Երբ Սեյֆը եկավ, նախ հայտարարեց, որ իրենք մեզնից ոչ մեկին չեն ստիպում, մենք գնալու ենք ամսեկան 2000 ԱՄՆ դոլար վարձատրության դիմաց, ով ցանկանում է կարող է վերադառնալ, բայց, եթե որոշեք մեզ հետ միասին գնալ Ադրբեջան և այնտեղից ինչ-որ մեկը ցանկություն հայտնի վերադառնալ, ոտքից կկրակեմ և չեմ թողնի»,- պատմում է սիրիացի արաբ վարձկանը՝ հավելելով, որ ընտրությունը կատարվում էր ըստ տարիքի, մասնավորապես, ընտրել են 20-40 տարեկան 500 անձի։

Վարձկանի խոսքով՝ Սեյֆն իրենց ասել է, որ իրենցից մեկ ամիս առաջ ևս 500 հոգանոց խումբ է մեկնել Ադրբեջան։ Վերջինս նշեց, որ Թուրքիայի Հանրապետության սահմանը հատելիս անցակետը հսկում էին ազգությամբ թուրք զինվորական և քաղաքացիական հագուստով անձինք, որոնք ոչինչ չեն հարցրել, փաստաթղթեր չեն ստուգել, միայն հաշվել են։ Վարձկաններին հարցեր չեն տվել նաև առաջին քաղաքացիական օդանավակայանում, այնտեղ բոլորին նստեցրել են մեծ քաղաքացիական օդանավ, որն Ադրբեջանի դրոշն էր կրում և վայրէջք է կատարել Ադրբեջանում։ Ադրբեջանի օդանավակայանում իրենց դիմավորել են Ադրբեջանի և Թուրքիայի ԶՈՒ զինծառայողները, տարել են կենտրոնական զորամաս, որտեղ նույնպես գտջնվում էին թուրք և ադրբեջանցի զինվորականներ, որոնց տարբերում էին համազգեստի վրայի դրոշներից։

«Նշված զորամասում մենք մնացել ենք երեք օր, առաջին օրը մեզ վզնոցներ տվեցին, որի վրա թվեր էին գրված, հետո նկարեցին մեզ այդ վզնոցներով։ Երկրորդ օրը նշված զորամասում մեզ համազգեստ և զենք հատկացրեցին, հատկացվել են ռուսական արտադրության ավտոմատներ՝ «ПКС», «РПГ», դիպուկահար զենքեր։ Բարձրաստիճան թուրք և ադրբեջանցի զինվորականներն ունեին և կրում էին զրահաբաճկոն, սակայն մեզ չեն հատկացրել»,- պատմում է նա։

Երկրորդ զորամասում գտնվում էին նաև Շեյխ Իբրահիմը և Աբու Համշան, մոտ հինգ անձ զինված շրջում էին, այնտեղ էին ևս 500 հոգի սիրիացի արաբներ։

«Աբու Համշան հանդիսանում էր խմբավորման ղեկավարը, նա էր ղեկավարում Սիրիայից Ադրբեջան եկող վարձու զինվորականներին և պատասխանատու էր նրանց համար։ Մեզ խմբերի էին բաժանել, Աբու Համշան մեզ ասում էր՝ ոչ մի անձի կյանք չխնայենք, ասում էր, որ բոլոր հայերին պետք է մորթենք, սպանենք»,- պատմում է նա՝ հավելելով, որ նույն հրահանգ է ստացվել նաև ադրբեջանցի և թուրք զինվորականներից։

Նրա խոսքով՝ ադրբեջանցի և թուրք զինվորականները, որոնք գալիս էին իրենց մոտ, ասում էին, որ յուրաքանչյուր հայի կտրված գլխի համար կստանա հավելյալ 100 դոլար, զենքից բացի նաև երկար դանակներ են տվել։

Ալ Հաջին պատմել է, որ վախեցողներին հատուկ հաբեր են տվել՝ սպիտակ, կլոր, որը խմելուց հետո վախն անցել է։

Աղբյուր` Փաստինֆո