Փաստ ինֆո

«ԱՄՆ-ում տեղի ունեցող նախագահական ընտրությունների այս պահին գրանցված արդյունքները հուշում են, որ երկու թեկնածուների միջև լարված մրցապայքար է ընթանում, առավել կարևոր և սկզբունքային նահանգներում ձայների հաշվարկը դեռևս ամբողջությամբ ավարտված չէ, դրանք դեռ ընթացքի մեջ են։ Մրցապայքարը չափազանց լարված է իրար շատ մոտ թվերով»,- ասում է միջազգայնագետ Սուրեն Սարգսյանը, «Փաստինֆո»-ի հետ զրույցում մեկնաբանելով ԱՄՆ-ում ընթացող նախագահական ընտրությունների արդյունքները։ 

Հարցին՝ երկու թեկնածուներից ո՞վ առավել մեծ շանսեր ունի հաղթանակ տոնելու, Սուրեն Սարգսյանը պատասխանում է.«Զուտ վիճակագրական տվյալներով ԱՄՆ հանրապետական նախագահներից որևէ մեկը երբևէ չի հաղթել ընտրություններում, առանց հաղթելու Օհայոում: Հիմա Թրամփը հաղթել է Օհայոի նահանգում։ Նորից եմ կրկնում սա զուտ վիճակագրական տվյալների արդյունքում։ Ինչպես արդեն նշեցի՝ քանի որ թեժ պայքար է՝շատ մոտ թվերով, այդ իսկ պատճառով, հիմա չէի ցանկանա որևէ կանխատեսում անել այս թեմայով»։

Ի՞նչ կարող է ակնկալել Հայաստանը ԱՄՆ-ում այսօր տեղի ունեցող նախագահական ընտրությունների արդյունքներից։ Միջազգայնագետը վստահ է՝ առանձնապես որևէ փոփոխություն այս կամ այն թեկնածուի հաղթանակի պարագայում Հայաստանում չի սպասվի.«Ամերիկյան քաղաքականությունը որևէ թեկնածուի հաղթանակի պարագայում Հայաստանի նկատմամբ փոփոխություն չի նախատեսի։ Այս առումով, առանձնապես, սպասելիքներ պետք չէ ունենալ, փոխարենը՝ պետք է պատրաստ լինել երկու թեկնածուների հետ էլ ակտիվ աշխատանքներ վարելու։

Ամերիկյան քաղաքականությունը մեր տարածաշրջանի նկատմամբ հստակ է, այստեղ հստակ շահեր կան, որոնք պայմանավորված են կարևոր մի քանի հանգամանքներով և առաջին հերթին՝ ԱՄՆ-ի տարածաշրջանում ունեցած քաղաքական հետաքրքրություններով։ Այստեղ պետք է հաշվի առնել ոչ միայն երկկողմ հարաբերությունները, այլ ԱՄՆ-ի հարաբերությունները մեր ռազմավարական դաշնակից Ռուսաստանի Դաշնության, մեր հարևան և բարեկամ Իրանի Իսլամական Հանրապետության, մեր հարևան Վրաստանի և, իհարկե, մեր թշնամի երկու պետությունների՝ Թուրքիայի և Ադրբեջանի հետ։

Այս ողջ փաթեթը դիտարկելով հասկանում ես, որ անկախ ընտրությունների արդյունքներից, մեծ հաշվով ամերիկյան քաղաքականության մեջ փոփոխություններ պետք չէ սպասել։ Չի լինելու նրա դիրքորոշման փոփոխություն Լեռնային Ղարաբաղի հակամարտության ենթատեքստում»։

Որքանո՞վ են հիմնավոր կանխատեսումներն առ այն, թե դեմոկրատ թեկնածու Ջո Բայդենի հաղթանակը լուրջ խնդիրների առաջ կարող է կանգնեցնել Հայաստանին՝ հաշվի առնելով լուրերը, թե վերջինս հայտնի է ընդգծված պրոթուրքական դիրքորոշմամբ, միջազգայնագետ Սուրեն Սարգսյանը պատասխանում է՝ այսօրինակ լուրերը զուրկ են որևէ օբյեկտիվ հիմքերից.

«Պետք չէ մոռանալ, որ մենք դեմոկրատ Բայդենը քաղաքական հայացքների հետ ծանոթ ենք, որովհետև նա տարբեր առիթներով հանրայնացրել է դրանք։ Ամեն ինչից զատ, Օբամայի նախագահության տարիներին Բայդենը զբաղեցնում էր փոխնախագահի պաշտոնը և կիսել է Բարաք Օբամայի ունեցած քաղաքական հայացքները։ Սա նշանակում է, որ այն քաղաքական գիծը, որ տարել է Բարաք Օբաման, դրանց մի մասի կրողն ու շարունակողը կլինի Ջո Բայդենը՝ նախագահական ընտրություններում հաղթելու պարագայում»։

Հեղինակ՝ Նվարդ Մանվելյան

Աղբյուր` Փաստինֆո