Փաստ ինֆո

Ադրբեջանում տեղեկատվական դաշտը փակ է և բավականին դժվար է տեղեկություններ ստանալ։ «Փաստինֆո»-ի հետ զրույցում այս մասին ասաց ադրբեջանագետ Տարոն Հովհաննիսյանը՝ անդրադառնալով Ադրբեջանի ներսում ադրբեջանցիների և ահաբեկիչների միջև հավանական բախումներին։

Այդուհանդերձ, ադրբեջանագետը նշեց, որ որոշակի տեղերից, սոցցանցերից անհանգստություններ, արձագանքներ լսվել են այն մասին, որ հնարավոր է՝ ահաբեկիչները տարածվել, ակտիվացել են նաև Ադրբեջանի տարածքում․

«Խնդիրներից մեկն այն է, որ այդ ահաբեկիչները սյունիական թևին են պատկանում և եթե այս պահին օգտագործում են ռազմական գործողություններում, ցանկացած պահի կարող են այդ երկրի ներսում դուրս գալ և օրինակ սադրանքներ իրականացնել Ադրբեջանի շիայական համայնքների նկատմամբ։ Այսինքն` բացառված չէ, որ Ադրբեջանում կարող են այդ խմբերը նման գործողություններ իրականացնել, որովհետև իրենց համար շիայականը և քրիստոնեականը գրեթե նույն հարթության վրա է դիտարկվում։ Իսլամի այլ ճյուղերին պատկանողները անհավատների նման են դիտարկվում»,-նշեց Տարոն Հովհաննիսյանը։

Հարցին՝ արդյոք կան տեղեկություններ, որ ահաբեկիչները երկրի ներսում ավերածություններ են անում, Տարոն Հովհաննիսյանն ասաց, որ տեղեկատվական դաշտը փակ է և նմանատիպ տվյալներն առայժմ հասանելի չեն․ «Տեսականորեն կարող է նման իրավիճակ առաջանալ, եթե վերջիններս ինչպես ռազմաճակատում լուրջ խնդիրներ ունենան։ Տարօրինակ տեղեկություններ կան, որ նրանք վճարվելու հետ կապված խնդիրներ են ունենում և նմանատիպ այլ հարցեր։ Այդ պարագայում հնարավոր է, բայց այս պահին հստակ տեղեկություն չկա»,-ասաց ադրբեջանագետը։

Հարցին՝ արդյոք Շուշիի շիայական մզկիթի ռմբակոծությունն Իրանին ուղղված ուղերձ էր պարունակում, Տարոն Հովհաննիսյանը դժվարացավ հստակ ասել, բայց նկատեց՝ ցանկացած տարբերակ արժանի է քննարկման, բայց բավարար ապացույցներ չկան նմանատիպ պնդումների համար․

«Ադրբեջանում պարզ է, որ հակաիրանական տրամադրություններ կան։ Իրանի ներսում թուրքախոսները, հակաիրանական, հակապարսկական լուրջ արշավներ, տրամադրություններ են տարածում։ Ցանկացած բան չի բացառվում։ Այս պահին պաշտոնական մակարդակով խուսափում են հակաիրանական հայտարարություններից, բայց ոչ պաշտոնական մակարդակում բնականաբար նման տրամադրություններ և գործողություններ առկա են»,-նշեց Տարոն Հովհաննիսյանը։

Աղբյուր` Փաստինֆո