Փաստ ինֆո

Թուրք-ադրբեջանական ագրեսիայի հետևանքով սանձազերծված պատերազմի ընթացքում գերեվարված Հադրութ քաղաքի բնակիչ, 85-ամյա Եվգենիա Բաբայանը պատմել է Բաքվում անցկացրած օրերի ընթացքում իր նկատմամբ անմարդկային վերաբերմունքի մասին։

ՀՀ Քննչական կոմիտեն տեսանյութ է հրապարակել՝ կնոջ հարցաքննությունից, որտեղ կինը պատմում է, որ հոկտեմբերի 15-ի, լույս 16-ի գիշերը ռմբակոծության հետևանքով  գիշերել է իր տան նկուղում, որը ծառայում է որպես ապաստարան, քանի որ պատերը հաստ են։

«Առավոտյան դուրս եմ եկել ապաստարանից, որ հավերիս կերակրեմ։ Հենց այդ պահին նկատեցի, որ տղամարդկանց ձայներ են մոտենում տանը։ Մտածեցի որդիս՝ Սուրենն է եկել տուն։ Այդ պահին տան դուռը բացվեց ու ադրբեջաներեն լեզվով խոսող շուրջ 10 զինվորական ներխուժեցին մեր տուն։ Տեսնելով նրանց, վախեցա և վայր ընկա։ Այդ պահին ադրբեջաներեն խոսող զինվորականները մոտեցան ինձ, ձեռքիցս քաշեցին, բարձրացրին և ասացին, որ ինձ Բաքու են տանելու։ Ես ընդդիմացա, ասացի, որ մեծ տարիքով կին եմ, սա իմ տունն է, ուզում եմ այստեղ մնալ, թողեք ինձ իմ տանը, սակայն ադրբեջանցի  զինվորականները  ձեռքերիցս քարշ տալով, տարան նստեցրին իրենց ավտոմեքենան։

Դրանից հետո ինձ տարել են Ադրբեջանի Բաքու քաղաք, որտեղ երեք ոստիկանական կետերի հետ եմ շփվել, ինձ շատ վատ են վերաբերվել, կարծես՝ կենդանու, շան տեղ դրած լինեին»,- պատմում է տարեց կինը՝ նշելով, որ ծարավ էր և,  երբ թեյ կամ ջուր է խնդրել, իրեն մի փոքր թեյ են տվել և կին ծառայողներից մեկը մի կտոր շաքար է գցել դիմացը, ինչից ինքը հրաժարվել է՝ նշելով, որ մարդ է, ոչ թե շուն։

Դրանից հետո իրեն տեղափոխել են երկրորդ ոստիկանական կետը, որտեղի աշխատակիցներն իրեն ստիպում էին, որ ասի՝ Փաշինյանը լավը չէ, ինքն է սարքել այս կռիվը։

«Ասում էին, որ ինքն է մեղավոր, ես էլ ասում էի, որ Հադրութն իրենցը չէ, այլ մերն է։ Իրենք ինձ տեսախցիկներով նկարում էին, հարցեր էին տալիս, ես իրենց ասածով պատասխանում էի։ Դրանից հետո ինձ տարան երրորդ ոստիկանական կետը, որտեղ երկու հայ կային՝ մեկը երիտասարդ տղա էր՝ քաղաքացիական հագուստով, մյուսը՝ տարիքով մեծ էր։ Երիտասարդին կապկպել էին՝ ձեռքերը, ոտքերը, փակել էին աչքերը, գցել էին մի անկյուն և հերթով քացի էին տալիս։ Տարիքով մեծ հայը ձեռքերը կոտրտված էին, նա ուղղված նստած էր, վրան հալ չկար։

Նշված երեք ոստիկանական բաժանմունքներից յուրաքանչյուրում ես մեկական օր եմ մնացել։ Երիտասարդ հայը, որի մասին նշեցի՝ հագին կար կապույտ գույնի քաղաքացիական վերնաշապիկ, ոտաբոբիկ էր։ Երրորդ օրը, երբ ինձ հանեցին բաժնից, հայ երիտասարդին գցել էին պարկի մեջ և քարշ տալով տարան և գցեցին ավտոմեքենան, իսկ մյուս տղամարդուն և ինձ նստեցրին ավտոմեքենան, որից հետո ինձ տարան Բաքվի հիվանդանոց, իսկ նշված երկու հայերին տարան ինձ անհայտ ուղղությամբ։ Հետո ինձ ասացին, որ այդ երկու հայերին իրենք մորթել են, վզները կտրել ու սպանել են»,- պատմում է արցախցի կինը։

ՀՀ քննչական կոմիտեի քրեագիտական վարչությունում շարունակվում է Արցախի Հանրապետության շփման գծի ողջ երկայնքով Ադրբեջանի Հանրապետության ռազմաքաղաքական ղեկավարության կողմից սանձազերծված և վարվող ագրեսիվ պատերազմի, միջազգային ահաբեկչության, զինված ընդհարումների ժամանակ միջազգային մարդասիրական իրավունքի նորմերի լուրջ խախտումներ կատարելու, զինված ընդհարման ժամանակ հանցավոր հրաման արձակելու, վարձկանության դեպքերով հարուցված քրեական գործի նախաքննությունը։Այս մասին  տեղեկանում ենք ՀՀ քննչական կոմիտեի ֆեյսբուքյան էջից։

Վարույթն իրականացնող մարմնի կողմից որոշում է կայացվել՝ սույն թվականի հոկտեմբերի 29-ին ԿԽՄԿ-ի ջանքերով ադրբեջանական կողմից ՀՀ վերադարձված քաղաքացիական անձին որպես տուժող ճանաչելու մասին, նշանակվել են դատաբժշկական և դատաքիմիական փորձաքննություններ։

Ստորև` տեսանյութում, ներկայացվում է նշված անձի հարցաքննությունից մեկ հատված։

ՀՀ քննչական կոմիտեն տեղեկացնում է նաև, որ  ՀՀ քննչական կոմիտեի զինվորական քննչական գլխավոր վարչության վեցերորդ կայազորային քննչական բաժնի և քրեագիտական վարչության ծառայողները նույն օրը մասնակցել են ռազմական գործողությունների ընթացքում 29 զոհված հայ զինծառայողների մարմինների՝ հայկական կողմին փոխանցման գործընթացին և տեղում, ՀՀ ԱՆ դատաբժշկական փորձաքննությունների գիտագործնական կենտրոնի դատաբժիշկ փորձագետների մասնակցությամբ, զուգահեռ իրականացրել զոհված զինծառայողների դիակների նախնական արտաքին զննություն:

Հայտնում ենք նաև, որ այսօր ՀՀ քննչական կոմիտեի ծառայողներից կամավոր զինվորագրված ևս մեկ խումբ մեկնել է մարտական ծառայության և միացել ՀՀ քննչական կոմիտեի նախագահի գլխավորությամբ մարտական ծառայություն իրականացնող  ծառայողներին:

Աղբյուր` Փաստինֆո