Փաստ ինֆո

Թուրք-ադրբեջանական ագրեսիայի հետևանքով ավելի քան մեկ ամիս շարունակվող պատերազմով պայմանավորված՝ ՔԿՀ-ներում գտնվող շուրջ երկու տասնյակ դատապարտյալներ պայմանականորեն ազատ են արձակվել՝ զինվորագրվելու և ռազմաճակատ մեկնելու համար։

Ինչպես ավելի վաղ տեղեկացրել ենք՝ ՔԿՀ-ներում անազատության մեջ գտնվող անձինք ևս դիմումներ էին ներկայացրել՝ խափանման միջոցի փոփոխման և առաջնագիծ մեկնելու համար, սակայն նրանց դիմումների վերաբերյալ որոշումներ չէր կայացվել, քանի որ օրենսդրական ընթացակարգը բացակայում է. կոնկրետ ռազմական դրությամբ պայմանավորված թե՛ խափանման միջոցների փոփոխության, թե՛ պատժից ազատման կարգ մենք չունենք։

Դատախազությունից «Փաստինֆո»-ին հայտնեցին, որ հոկտեմբերի 28-ի դրությամբ՝ ռազմաճակատ մեկնելու նկատառումներով փոփոխվել է 12 դատապարտյալի խափանման միջոց, չորս դատապարտյալ էլ վաղաժամկետ պայմանականորեն ազատ է արձակվել՝ ռազմաճակատ մեկնելու հիմքով։ Դատախազությունից հայտնեցին, որ անհատական մոտեցում է ցուցաբերվում՝ հաշվի առնելով խնդրի նրբությունը։

Նշենք, որ հոկտեմբերի 29-ին «Փաստինֆո»-ն տեղեկացրել էր, որ երկու մեղադրյալի նկատմամբ ընտրված խափանման միջոց կալանավորումը փոխվել է դատարանների կողմից՝ հենց ռազմաճակատ մեկնելու հիմքով։ Ընդ որում՝ մեղսագրվող արարքները ծանր և առանձնապես ծանր էին, մասնավորապես, մեղադրյալներից մեկը մեղադրվում էր սպանության, իսկ մյուսը՝ խարդախության մեջ։

Հիշեցնենք, որ սեպտեմբերի 27-ին Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում է նաեւ Թուրքիան, վարձկան-ահաբեկիչներ՝ Սմերչ, Պոլոնեզ, թուրքական Կասիրգա եւ այլ զինատեսակներով հրթիռակոծելով խաղաղ բնակավայրերը, այդ թվում մայրաքաղաք Ստեփանակերտը։ ՀՀ ԱԳՆ-ն հայտարարել է, որ Արցախի ժողովուրդը մարտնչում է թուրք-ադրբեջանական դաշինքի դեմ ու ընդգծել՝ Թուրքիան հավաքագրում է օտարազգի ահաբեկիչ զինյալների և տեղափոխում նրանց Ադրբեջան։ Հայաստանում եւ Արցախում սեպտեմբերի 27-ին հայտարարվել է ռազմական դրություն և ընդհանուր զորահավաք։

Հեղինակ՝ Իզաբել Սահակյան

Աղբյուր` Փաստինֆո