Փաստ ինֆո

Արցախում հայրենիքի պաշտպանության համար մղվող մարտերում զոհված զինծառայող Գոռ Թումանյանը Աշտարակ քաղաքից էր: Կենսուրախ, ակտիվ երիտասարդ՝ օժտված երգելու բացառիկ ձիրքով: Աշտարակ քաղաքում միջոցառումների ժամանակ բեմը Գոռին էր վստահվում, շատ էր սիրում հայրենասիրական երգեր կատարել.

«Մինչև ծառայությունը տարբեր երկրներից հրավերներ ուներ համերգներին մասնակցելու, բայց շնչառական խնդիրներ ուներ, պետք է վիրահատվեր ու մեկներ Իտալիա, բայց գնաց ծառայության, որոշել էր, ծառայությունից վերադառնար ու մեկներ: Հաճախ էր զանգում, ասում թեժ մարտեր են, տեսանյութեր էր ուղարկում, որ հակառակորդի ԱԹՍ են խփում, ուրախանում: Պապան էլ կռվի առաջին օրերից Գոռի կողքին է եղել, կամավորագրվեց, գնաց,Գոռը որ զանգում էր, ասում էր՝ուժեղ մարտեր են, ինչի՞ ես պապային թողել, որ գա:Վերջին անգամ, որ զանգեց տխուր էր, ոնց որ զգար՝ իրա հետ մի բան է լինելու»,-«Փաստինֆո»-ի հետ զրույցում պատմում է Գոռի եղբայրը՝ Սամվել Թումանյանը:

Եղբոր հաղորդմամբ՝ Գոռը մեծ պատրաստակամությամբ և ոգևորությամբ էր ծառայում, ինչի համար մինչև պատերազմը ներկայացվել է «Քաջարի մարտիկ» մեդալի:

Գոռը ոչ միայն լավ երգում էր, նաեւ՝ վաշտի ամենահմուտ կապավորն էր, կապի հետ կապված խնդրի դեպքում դիմում էին Գոռին.

«Գոռը կապի վրա էր, շատ լավ կապավոր էր: Կռվի օրերին մի կերպ, կռիվ մղելով հասցրել է կապի մարտկոցները փոխի, որպեսզի իրենց դիրքը կապ ունենա: Ջալալ Հարությունյանը մի քանի անգամ է տեսել Գոռին, բայց շատ է տպավորվել, որովհետև Գոռը համ լավ երգում էր, համ լավ կապավոր էր, մի անգամ էլ կանգնեցրել է իրենց զորագունդը ու գովել Գոռին, ասել, որ ինքը ամենալավ կապավորն է»,-պատմում է եղբայրը:

Մինչև պատերազմը Մարտունի քաղաքի զորամասային դպրոցում Գոռը երեխաներին երգեցողություն է դասավանդել, նաև՝ քաղաքի եկեղեցում :

«Սիրած աղջիկ ուներ, որի հետ ընկերություն է արել 1 ամիս ու մեկնել է ծառայության:Հունվարի 29-ին պետք է զորացրվեր»,-պատմում է Արցախում զոհված զինծառայող Գոռ Թումանյանի եղբայրը՝ Սամվելը:

Աղբյուր` Փաստինֆո