Փաստ ինֆո

ԵՊՀ Արևելագիտության ֆակուլտետի շրջանավարտները վճարել են ԵՊՀ Արևելագիտության ֆակուլտետում սովորող այն ուսանողների վարձավճարները, որոնց ծնողներն այս օրերին Արցախում են՝ առաջնագծում։

«Մեր երկրում ստեղծված պատերազմական իրավիճակն առիթ հանդիսացավ, որպեսզի ես՝ որպես ԵՊՀ Արևելագիտության ֆակուլտետի դեկան, ելքեր փնտրեմ այս օրերին ռազմաճակատում պայքարող զինծառայողների զավակների, ինչպես նաև, կամավորական հիմունքներով այնտեղ մեկնած ուսանողների ուսման վարձավճարի խնդիրները լուծելու համար։ Այս հարցով, ես որոշեցի դիմել արտերկրում ապրող իմ ընկերներին, ովքեր նույնպես Արևելագիտության ֆակուլտետի շրջանավարտներ են, ինչպես ակնկալում էի, այս նախաձեռնությունը դրական ընդունելության արժանացավ,- «Փաստինֆո»-ի հետ զրույցում ասաց Արևելագիտության ֆակուլտետի դեկան, թուրքագետ Ռուբեն Մելքոնյանը։

Նա ուրախությամբ արձանագրեց, որ Սփյուռքում ապրող մեր շատ հայրենակիցներ, օպերատիվ և արագ արձագանքել են իր այս նախաձեռնությանը և սրանով շատ ուսանողների վարձավճարի հարցեր այս կիսամյակի համար լուծվել են, սակայն սա բոլորովին չի նշանակում, որ պետությունը պետք է թուլացնի իր գործառույթներն այս ուղղությամբ»։

Արևելագիտության ֆակուլտետի դեկանը նշում է՝ ռազմական դրությամբ պայմանավորված չի կարող հրապարակել ուսանողների թվաքանակը, որոնց ուսման վարձավճարների խնդիրը լուծվել է, չբացահայտելու համար՝ քանի ծնող է այս պահին ԵՊՀ Արևելագիտության ֆակուլտետից գտնվում առաջնագծում, սակայն հավելում է՝ իր նախաձեռնությանն ակտիվ կերպով արձագանքել են հիմնականում ԱՄՆ-ից և ՌԴ-ից. «Այս նախաձեռնությունը, բացի նյութական խնդիրներ լուծելուց, նպատակ ունի նպաստել նաև բարոյական լիցքերի ակտիվացմանը։

Բացի նրանից, որ առաջնագծում պայքարող մեր զինվորներին սրանով ցույց տվեցինք թիկունքի ամուր ուժն ու համախմբումը, այն որ մենք այստեղ նրանց և նրանց ընտանիքների կողքին ենք, սա նաև ֆակուլտետի սերունդների կապի հարցն է։ Հույս ունեմ, որ սա վարակիչ և օրինակելի նախադեպ կդառնա նաև այլ ուսումնական հաստատությունների համար, ժամանակակից լեզվով ասած՝ չելենջ, որի միջոցով այլ ֆակուլտետների շրջանավարտները ևս փորձեն ֆինանսապես և բարոյապես նեցուկ կանգնել առաջնագծում մարտնչող մեր զինծառայողներին ու նրանց ընտանիքներին»,- եզրափակում է զրույցը ԵՊՀ Արևելագիտության ֆակուլտետի դեկան Ռուբեն Մելքոնյանը:

Հեղինակ՝ Նվարդ Մանվելյան

Աղբյուր` Փաստինֆո