Փաստ ինֆո

Ժնևյան հանդիպմանը հերթական անգամ կողմերը կներկայացնեն սեփական դիրքորոշումը խնդիրների վերաբերյալ և, ասել, թե այնտեղ կարող է հստակ ստեղծվել գրաֆիկ, թե ինչպես են կողմերն իրականացնելու խնդրի կարգավորմանն ուղղված կոնկրետ գործողությունները շատ բարդ է,-այս մասին «Փաստինֆո»-ի հետ զրույցում ասաց քաղաքագետ Ալեքսանդր Մարգարովը:

Ինչպես ավելի վաղ հայտնել էինք, ԵԱՀԿ Մինսկի խմբի նախաձեռնությամբ՝ այսօր Ժնևում նախատեսված էր Հայաստանի և Ադրբեջանի ԱԳ նախարարներ Զոհրաբ Մնացականյանի և Ջեյհուն Բայրամովի հանդիպումը: Սակայն ռուսական աղբյուրների հաղորդմամբ՝ հանդիպումը հետաձգվել է մեկ օրով։ Նախատեսվում է, որ այն կկայանա հոկտեմբերի 30-ին:

Մեզ հետ զրույցում քաղաքագետ Ալեքսանդր Մարգարովը հիշեցրեց, որ Ժնևյան հանդիպման որոշման մասին հայտարարելիս նշվել էր, որ կա նաեւ երեք նախապայման։ Մասնավորապես՝ կողմերին կոչ էր արվում հաստատել հումանիտար հրադադար, քննարկել հրադադարի մոնիթորինգի չափորոշիչները և ուշադրություն դարձնել այն հիմնական տարրերին, որոնց շուրջ հետագայում պետք է տեղի ունենա քննարկումը: «Բայց, ինչպես տեսնում ենք, այս երեք կետերից ոչ մեկը կյանքի չի կոչվել»,- նկատեց քաղաքագետը:

«Ժնևում նախատեսված է եղել այն օրակարգը, որ կողմերը պետք է քննարկեին խաղաղ կարգավորման հետ կապված կոնկրետ խնդիրներ, և կար մի դրույթ, որ կողմերը պետք է արդեն համաձայնեցրած լինեին՝ հիմնարար սկզբունքները, բայց կա միայն տեսական կմախք, ինչին պետք է անդրադառնալ։ Կողմերի մոտ չկա այն ընդհանուր ընկալումը՝ թե , որոնք են այն հարցեր, որոնք շուրջ արդեն իսկ ունեն համաձայնություն:Կարելի է ենթադրել, որ Ժնևյան հանդիպմանը հերթական անգամ կողմերը կներկայացնեն սեփական դիրքորոշումը խնդիրների վերաբերյալ և, ասել, թե այնտեղ կարող է հստակ ստեղծվել գրաֆիկ, թե ինչպես են կողմերն իրականացնելու կարգավորմանն ուղղված կոնկրետ գործողությունները շատ բարդ է, որպես վատագույն տարբերակ, դա արդեն պատրաստի փաստաթղթի դեմ տալն է, բայց նույնիսկ, եթե նման փաստաթուղթ առկա է, ես կասկածում եմ , որ կողմերի մոտ լինելու է համաձայնություն»,- ասաց Մարգարովը:

Վերջինիս դիտարկմամբ՝ հայկական կողմը նշել է, որ ունենք, այսպես կոչված, մեր կարմիր գծերը, որի ներսում գտնվում է Արցախի անկախությունն ու դրա ճանաչման խնդիրը, իսկ Ադրբեջանն ունի տվյալ կարմիր գծերից դուրս մոտեցում՝ առ այն, որ թույլ չեն տա հանրաքվեի անցկացումը, ոչ էլ տեսնում են Արցախը իրենց կազմից դուրս և այս կարմիր գծերի պարագայում մենք շարունակում ենք բանակցությունը, բայց, նույնիսկ ժամանակավոր հարցերը՝ կապված հումանիտար հրադադարի հետ, կյանքի չեն կոչվել, ինչ մնաց ավելի լուրջ հարցեր քննարկվեն

Փորձագետի նաև նկատեց, որ հանդիպման հետաձգումը վատ նշան չէ և հավանաբար, դեռ կան խնդիրներ, որոնց շուրջ կողմերը համաձայնության պետք է գան:

Մեր այն դիտարկմանը՝ինչու՞ Ռուսաստանն ավելի կոնկրետ քայլեր չի ձեռնարկում թուրքական նկրտումները զսպելու համար,քաղաքագետը պատասխանեց, որ Ռուսաստանի ազդակները և մտահոգությունները հասնում են Անկարա, ինչի վկայությունը թուրքական կողմի նախաձեռնությամբ հեռախոսազանգն էր ՌԴ նախագահին.

«Երբ Ռուսաստանը հայտնում է խորը մտահոգություն, դիվանագիտորեն թարգմանած, դա նշանակում է՝ դուք վերջին անգամ եք նախազգուշացվում, իսկ ավելի խիստ քայլ դա արդեն ռազմական բախումն է, ինչը, բնականաբար, Ռուսաստանը որպես լուծման տարբերակ չի տեսնում:Տեսանք, որ ռմբակոծություններ եղան,և Թուրքիայի նախագահը անմիջապես զանգեց ՌԴ նախագահին և, քննարկեցին Սիրիայի, Լիբիայի և Լեռնային Ղարաբաղի հարցերը, այսինքն Ռուսաստանից ազդանշանները գնում են, դրանց ընկալման խորությունը արդեն մյուս կողմի խնդիրն է»:

Աղբյուր` Փաստինֆո