Փաստ ինֆո

Երևանը բավական առիթներ ունի դիմելու ՀԱՊԿ-ի դաշնակիցներին՝ ադրբեջանական հարձակումները զսպելու նպատակով։ Այս մասին  «Аргументы недели»-ի փոխանցմամբ՝ համապատասխան տեսակետ է հայտնել ռազմական փորձագետ, ՌԴ գլխավոր շտաբի նախկին աշխատակից Կոնստանտին Սիվկովը։

Սիվկովը նշել է, որ Հայաստանին աջակցություն ստանալը թույլ է տալիս Հավաքական անվտանգության պայմանագրի չորրորդ կետը։ Փորձագետի խոսքով՝ հակամարտությանը Մոսկվայի միջամտության դեպքում Ռուսաստանի ռազմատիեզերական ուժերը Ղարաբաղի բանակի հետ միասին կարող են երեք օրվա ընթացքում ջախջախել Ադրբեջանի զինված ուժերը:

Ինչպես արդեն տեղեկացրել ենք` սեպտեմբերի 27-ին թուրք-ադրբեջանական տանդեմը՝ ահաբեկիչների ներգրավվմամբ ռազմական ագրեսիա են սկսել Արցախի նկատմամբ եւ արդեն ավելի քան մեկ ամիս է, ինչ ռազմական գործողությունները չեն դադարում Արցախի տարածքում՝ թիրախավորելով խաղաղ բնակչությունը, քաղաքացիական ենթակառուցվածքները, եկեղեցիներ, հիվանդանոցներ։

ԱՄՆ-ում տեղի ունեցած բանակցությունների արդյունքում հոկտեմբերի 25-ին Հայաստանի, Ադրբեջանի ու ԱՄՆ-ի արտաքին գերատեսչությոնները հայտարարեցին հումանիտար հրադադարի վերաբերյալ պայմանավորվածություն ձեռք բերելու մասին։

Այն ուժի մեջ պետք է մտներ 2020թ. հոկտեմբերի 26-ին, տեղական ժամանակով՝ 08:00-ին, սակայն Ադրբեջանը հերթական անգամ կոպտորեն խախտել է ԱՄՆ-ում ձեռք բերված հումանիտար հրադադարի մասին պայմանավորվածությունը, ժամը 08:45-ի սահմաններում հրետանային կրակ է վարել Արցախի հյուսիս-արևելյան մարտական դիրքերի ուղղությամբ, իսկ 09:10-ի սահմաններում թիրախավորել է հարավարևելյան ուղղությամբ դիրքերը`արձակելով հինգ հրետանային արկ: Ավելի ուշ՝ ժամը 11-ի մոտակայքում,հակառակորդը թիրախավորել է նաեւ Մարտունի քաղաքը՝ կիրառելով ռազմական ավիացիա, իսկ ժամը 17-ից հետո սկսել է կրակ վարել ամբողջ սահմանագծի երկայնքով։

«Փաստինֆո»-ի հաղորդմամբ` սա հումանիտար հրադադարի երրորդ փորձն էր. առաջին երկրորդ փորձերը` հոկտեմբերի 10-ին ու 18-ին ձախողվել են, քանի որ Ադրբեջանը դրանք խախտել է:

Աղբյուր` Փաստինֆո