Փաստ ինֆո

Ադրբեջանի նախագահ Իլհամ Ալիևը հայտարարել է, որ պատրաստ է Մոսկվայում բանակցել Հայաստանի վարչապետ Նիկոլ Փաշինյանի հետ առանց որևէ նախապայմանի: Հայտնում է «Ինտերֆաքս»-ը:

Ընդ որում՝ Արցախի նկատմամբ սեպտեմբերի 27-ին ռազմական ագրեսիան սկսած Ադրբեջանի ղեկավարը հայտարարել է, թե կասկածում է ղարաբաղյան հակամարտության կարգավորման ուղղությամբ Երևանի  կառուցողական վերաբերմունքի մեջ։

«Ես նման հրավեր չեմ ստացել։ Ես բազմիցս մասնակցել եմ Ադրբեջանի, Հայաստանի և Ռուսաստանի նախագահների եռակողմ հանդիպումներին, բայց այն բանից հետո, երբ Հայաստանում իշխանության եկավ Փաշինյանը, նման հանդիպումներ չեն եղել։ Այդ հանդիպումները եղել են Հայաստանի նախորդ նախագահների հետ, և ես երբեք այդ հանդիպումներից չեմ խուսափել»,- ասել Է Ալիևը։ Նա ընդգծել է, որ այդ հանդիպումները դրական է համարել, քանի որ Ռուսաստանը, որպես Մինսկի խմբի համանախագահ, առանձնահատուկ դեր է խաղում հակամարտության կարգավորման գործում:

«Ռուսաստանը միշտ սերտ կապեր է ունեցել և՛ Հայաստանի, և՛ Ադրբեջանի հետ, և այսօր քաղաքական, տնտեսական փոխգործակցության առումով Ռուսաստանը շատ ակտիվ համագործակցում է Ադրբեջանի և Հայաստանի հետ, մեր հարևանն է։ Այդ պատճառով, իհարկե, ամենից շատ նման հանդիպումներ են անցկացվել Ռուսաստանի տարածքում, բայց Փաշինյանի օրոք նման հանդիպումներ չեն եղել։ Ես չգիտեմ, թե որքանով են դրանք արդյունավետ լինելու հիմա․.. Բայց եթե նման առաջարկ լինի, մենք միշտ այն դրական ենք դիտարկել և կդիտարկենք», — ասել է նա։

Ադրբեջանի նախագահը հայտարարել է, որ պատրաստ է Մոսկվա գնալ Հայաստանի վարչապետի հետ բանակցությունների, «ընդ որում, ինչպես դուք եք ասում՝առանց նախապայմանների»,- ասել է Ալիևը։

Ինչպես արդեն տեղեկացրել ենք` սեպտեմբերի 27-ին թուրք-ադրբեջանական տանդեմը՝ ահաբեկիչների ներգրավվմամբ ռազմական ագրեսիա են սկսել Արցախի նկատմամբ եւ արդեն ավելի քան մեկ ամիս է, ինչ ռազմական գործողությունները չեն դադարում Արցախի տարածքում՝ թիրախավորելով խաղաղ բնակչությունը, քաղաքացիական ենթակառուցվածքները, եկեղեցիներ, հիվանդանոցներ։

ԱՄՆ-ում տեղի ունեցած բանակցությունների արդյունքում հոկտեմբերի 25-ին Հայաստանի, Ադրբեջանի ու ԱՄՆ-ի արտաքին գերատեսչությոնները հայտարարեցին հումանիտար հրադադարի վերաբերյալ պայմանավորվածություն ձեռք բերելու մասին։

Այն ուժի մեջ պետք է մտներ 2020թ. հոկտեմբերի 26-ին, տեղական ժամանակով՝ 08:00-ին, սակայն Ադրբեջանը հերթական անգամ կոպտորեն խախտել է ԱՄՆ-ում ձեռք բերված հումանիտար հրադադարի մասին պայմանավորվածությունը, ժամը 08:45-ի սահմաններում հրետանային կրակ է վարել Արցախի հյուսիս-արևելյան մարտական դիրքերի ուղղությամբ, իսկ 09:10-ի սահմաններում թիրախավորել է հարավարևելյան ուղղությամբ դիրքերը`արձակելով հինգ հրետանային արկ: Ավելի ուշ՝ ժամը 11-ի մոտակայքում,հակառակորդը թիրախավորել է նաեւ Մարտունի քաղաքը՝ կիրառելով ռազմական ավիացիա, իսկ ժամը 17-ից հետո սկսել է կրակ վարել ամբողջ սահմանագծի երկայնքով։

«Փաստինֆո»-ի հաղորդմամբ` սա հումանիտար հրադադարի երրորդ փորձն էր. առաջին երկրորդ փորձերը` հոկտեմբերի 10-ին ու 18-ին ձախողվել են, քանի որ Ադրբեջանը դրանք խախտել է:

Աղբյուր` Փաստինֆո