Փաստ ինֆո

Ազգային ժողովը քննարկում էր Վերականգնման վարկերի բանկի հետ ֆինանսական համաձայնագրերը երկարրաձգելու հարցը, որով ՀՀ-ն լրացուցիչ վարկային միջոցներ կներգրավի 155,462, 000 եվրոյի չափով։ 

«Լուսավոր Հայաստան» խմբակցության պատգամավոր Արկադի Խաչատրյանը նշեց, որ ժամանակին այս երեք ծրագրերի գծով, վարկային միջոցները չօգտագործելու համար, պետությունը լրացուցիչ պետք է վճարի պարտավորավճար ՝ 383, 656 եվրոյի չափով տուգանային վճար։
«Բացի դրանից այս վարկերը երկարաձգելու համար նախատեսվում է, որ պետությունը պետք է վճարի երկարաձգման համար հատուցման վճար 3,440,000 եվրոյի չափով»,- ընդգծեց Արկադի Խաչատրյանը։

Երբ որ որևիցե մի գյուղապետ 100 000 դրամ արժողությամբ աթոռ տանի իրենց տունը, կդատապարտվի կամ քրեական գործ կհարուցվի պաշտոնական դիրքը չարաշահելու և համայնքային գույքը յուրացնելու համար՝ նկատեց պատգամավորը։

«Վերջերս Ճամբարակից տեղեկություն ստացանք, որ ռազմական դրության ժամանակ, ցուրտ եղանակի պատճառով վաշտի հրամանատարը հանձնարարել է ցախ բերել, տղաները գնացել են Տավուշի մարզի անտառներ, ամենայն հավանականությամբ ծառ են կտրել, անտառային տնտեսությունը նկատել է, արձանագրել, հարուցվել է քրեական գործ, առգրավվել ցախը, ըստ տեղեկություններից՝ շուրջ 6 խորանարդ մետր է եղել, և ավտոմեքենաները, որի հետևանքով տղաները զրկվել են տաքանալու և տեղաշարժվելու հնարավորությունից։ Ես միանշանակ կողմնակից եմ իրավական պետությանը, բայց եթե մենք կարողանում ենք ռազմական դրության պայմաններում զինվորին տաքացնելու համար ծառ կտրողի նկատմամբ քրեական գործ հարուցել, ինչպե՞ս հասկանանք, որ Հայաստանում երկրի համար լրացուցիչ ծրագրերը ոչ արդյունավետ կազմակերպելու և իրականացնելու համար, ճիշտ որոշումներ կայացնելու, տեխնիկական ճիշտ լուծումներ գտնելու, մեր անկարողության պատճառով պետության համար առաջնանում է շուրջ 3, 800, 000-ից ավելի ծախս կատարելու և երկրին լրացուցիչ վնաս հասցնելու իրավիճակ»։

Պատգամավորը բոլորի ուշադրությունը հրավիրեց այս փաստի վրա, իսկ պատգամավոր Վլադիմիր Վարդանյանը հավելեց, որ խոսել է Քննչական կոմիտեի նախագահի հետ, Տավուշի մարզում զինվորների կողմից ծառ կտրելու դեպքի առնչությամբ քրեական գործի հարուցումը մերժվել է։

Աղբյուր` Փաստինֆո