Փաստ ինֆո

ՀՀ քննչական կոմիտեն այսօր հրապարակել է ադրբեջանցի ռազմագերիի հարցաքննության կադրերը։

Վերջինս պատմել է, որ 2020 թվականի սեպտեմբերի 3-ին կամ 5-ին Ադրբեջանի հանրապետությունում հայտարարվել է զորահավաք։ Սույն թվականի ամռանը անցկացվել են լայնածավալ զորավարժանքներ, որոնք ավարտելուց հետո Թուրքիայի բանակից եկած զինվորական կազմը մնացել է Ադրբեջանում։ Նաև տեղեկացել են, որ պատերազմը սկսվելու ժամանակ զինվորներին պետք է օգնեին նաև Պակիստանից ժամանած զինծառայողները։

«Թուրքիայից ժամանած զինվորական մասնագետները մեր դասակի հետ մարտական պատրաստականության դասընթացներ են անցկացրել 3-ից 5 օր, որի նպատակը եղել է լեռներում մարտ վարելու ձևերին տիրապետելը։ Զինվորականները միայն մեզ հետ չեն անցկացրել, այլ ծառայության բերումով տեսել եմ մյուս ստորաբաժանումների հետ նշված՝ Թուրքիայից եկած զինվորականներն անցկացրել են դասընթացներ։ Մեր զորամասի ողջ անձնակազմի հետ՝ 10-15 օր են անցկացվել այդ դասընթացները։
Թուրքերը, երբ մեր զորամաս են ժամանել, մեզ ասել են, որ պատրաստվենք , որ լեռներում մարտական պատրաստվածության դասընթացներ պետք է անցկացվեն։ Մեզ ասել են, որ պատրաստվենք պատերազմի, քանի որ պատերազմական գործողություններ են լինելու, պետք է հարձակում գործենք մեր միակ թշնամու՝ հայկական դիրքերի ուղղությամբ»,- պատմել է ռազմագերին։

Թուրքիայից ժամանած զինվորականները եղել են զինվորական համազգեստով, բայց համազգեստին կոչումներ չեն եղել փակցված։

«Մենք նրանց դիմել ենք ոչ անունով, ոչ ազգանունով, ուղղակի դիմել ենք՝ հրամանատար»։

2020 թվականի սեպտեմբերի 20-21-ը զորամասի գումարտակով դուրս են եկել զորամասից և Կամազ, Ուրալ մակնիշի ավտոմեքենաներով շարժվել են դեպի Գյուլիստանի ուղղությամբ։

«Իմ անմիջական հրամանատար Ահմադ Հանիֆաևը ասել է, որ թշնամու՝ հայկական դիրքերը դատարկ են՝ 5-7 զինծառայողներ կլինեն։ Հրաման է տրվել նրանց էլ ոչնչացնել, գրավել և տեղակայվել հայերի մարտական դիրքերում»։

Ռազմագերին ասում է, որ հրաման էր տրվել՝ որքան շատ գրավեին, այդքան լավ կլիներ։
Իրենց պետությունը բանակի համար Իսրայելից , Թուրքիայից, ձեռք են բերել հրթիռային արկեր, ԱԹՍ-ներ, որոնք կառավարվում էին թիկունքից։

«Քաղաքացիական բնակչության տների բակերում տեղադրվել են հրթիռահրետանային միջոցներ։ Կան տան բակեր, որտեղ ծառերը շատ են և բնակավայրերի ներսում՝ տների բակերում, որտեղ ապրում են բնակիչներ, տեղադրվել են հրթիռահրետանային միջոցներ, որոնք կիրառվել են մարտական գործողությունների ընթացում։ Այդ բնակավայրերում քաղաքացիական բնակիչները շարունակել են ապրել, բնակվել»,- պատմել է ռազմագերին։

Ռազմագերին նաեւ հավաստել է, որ իրեն նորմալ է զգում, լավ է։ «Օրվա ընթացքում ինձ երեք անգամ կերակրում են, ջուր են տալիս։ Առողջական վիճակս լավ է։ Այստեղ ինձ նորմալ են վերաբերվում, բռնություն չեն կիրառում, խոշտանգումներ չկան։ Ձախ ոտքիցս վիրավորել են, ամեն օր վերքս մշակվում, վիրակապս փոխվում է», - այս մասին ադրբեջանցի ռազմագերին է պատմել հարցաքննության ժամանակ։

Աղբյուր` Փաստինֆո