Փաստ ինֆո

«Իմ կարծիքով հոկտեմբերի 27-ի ոճրագործությունը նույնպես տեղի է ունեցել ղարաբաղյան հիմնահարցի պատճառով։ Վստահ եմ, եթե հոկտեմբերի 27-ը չլիներ, դժվար թե Ադրբեջանը մի օր քնից արթնանար ու պատերազմ սկսեր, կամ շատ երկար կմտածեր, - այս մասին այսօր ասում է Եռաբլուրում հոկտեմբերի 27-ի ոճրագործության 21-րդ տարելիցին, սպարապետ Վազգեն Սարգսյանի շիրիմին այց եկած Արամ Զավենի Սարգսյանը և հավելում, - այն ժամանակ ակնհայտ էր, որ մենք հզորանում էինք, ոտքի էինք կանգնում, այլ ժամանակների բանակ էինք ունենալու և հավանաբար նաև այդ մեղքի համար է, որ այս պատերազմը չի վերջանում։ Պետք է կարողանանք գոնե այս անգամ վերջակետ դնել, որովհետև տարբերակ չէ՝ այս հարցն անընդհատ թողնել հաջորդ սերնդին»։ 

Պատասխանելով հարցին՝ ի՞նչ ելք է տեսնում Արամ Սարգսյանը հրադադարի ռեժիմն անընդհատ ձախողող և պատերազմին վերջ չդնող ադրբեջանական կողմի վարքագծի կապակցությամբ, վերջինս պատասխանում է.«Այս թեմայով վարչապետը երեկ ամեն ինչ ասաց, ավելացնելու ոչինչ չկա։ Հողն ու հայրենիքը պաշտպանել է պետք, և յուրաքանչյուր մարդ ինքը պետք է որոշի ինչպես պետք է պաշտպանի իր հայրենիքը։ Ինչքան ես եմ հասկանում՝ պատերազմը որոշակի ժամանակ է վերցնելու և պետք է սովորել ապրել պատերազմի պայմաններում։ Դիմացը ձմեռ է՝ պետք է համապատասխան կառույցներ ձևավորեն։ Պետք չէ հուսահատվել, որովհետև մենք առաջնագծում մարտնչող խիզախ տղաներ ունենք, իսկ ռազմադաշտ պետք է գնան նրանք, ովքեր հավատում են հաղթանակին, պատրաստ են կռվելու և հաղթելու»,- ասում է Արամ Սարգսյանը։

Հարցին՝ արդյո՞ք ինքը՝ Արամ Սարգսյանը պատրաստ է ցավոտ զիջումների գնալ, թե՞ պատրաստ է մինչև վերջ գնալ և ինչպե՞ս է գնահատում վարչապետի վերջին ելույթի այդ հատվածը, վերջինս պատասխանում է.«Նայած թե դուք մինչև վերջ գնալ ասելով ինչ եք հասկանում, եթե մինչև Բաքու գնալ, ապա ես դա չեմ ընդունում։ Ինչ վերաբերում է վարչապետի փոխզիջումների մասին արած հայտարարությանը, ապա այդ խնդիրը մեր բոլոր իշխանություններն էլ դրել են փոխզիջումների մեջ, ուղղակի Ադրբեջանն ամեն անգամ փոխզիջում ասելով՝ մի քիչ ավելին է ուզել ու հիմա ինքն ուզում է կամ ամբողջը, կամ ոչինչ։ Վարչապետն ասում էր, որ ինքը պատրաստ է փոխզիջումների, պատրաստ է պատերազմը կանգնեցնելու, բայց Ալիևն ուզում է ամբողջը։ Եթե կա ուրիշ ելք, բացի կռվելը՝ ասեք ես ել իմանամ»,- հռետորական հարցն ուղղելով լրագրողներին, ամփոփում է զրույցը սպարապետի եղբայր Արամ Սարգսյանը։

Աղբյուր` Փաստինֆո