Փաստ ինֆո

Ադրբեջանի ԶՈՒ` գլխավոր գերագույն հրամանատար, նախագահ Իլհամ Ալիևի, Զաքիր Հասանովի և այլ բարձրաստիճան զինվորական պաշտոնյաների հրամանատարությամբ, Թուրքիայի ղեկավարության հետ միասին ծրագրել և իրականացրել են ագրեսիայի ակտ։ Այսօր նման հայտարարությամբ է հանդես եկել ՀՀ ՔԿ քրեագիտական վարչության պետ Ռաֆայել Վարդանյանը։

Վերջինս ներկայացրել է Ադրբեջանի ձեռնարկած ռազմական ագրեսիայի դեպքերի առթի հարուցված քրեական գործերի քննության ընթացքը։ Ըստ այդմ՝ նշել է, որ մեկ շղթայի մեջ են դիտարկվում 2020 թվականի հուլիսի տավուշյան դեպքերը, սեպտեմբերի 27-ին Արցախի, 28-ին նաեւ Հայաստանի նկատմամբ կատարված ռազմական գործողությունները։

Միայն Տավուշի դեպքերի վերաբերյալ ՀՀ ՔԿ-ում հարուցվել է ընդհանուր թվով 38 քրեական գործ, որոնք միացվել են մեկ վարույթում և ձեռք բերված հարուցվել է նոր քրեական գործ՝ Ադրբեջանի կողմից ագրեսիվ պատերազմ հրահրերու, մարդասիրական իրավունքի նորմերի լուրջ խախտումներ կատարելու, միջազգային պայմանագրով արգելված միջոցներ և մեթոդներ կիրառելու, զինված ընդհարման ժամանակ հանցավոր հրաման արձակելու առերևույթ հանցավոր արարքներ կատարելու դեպքերի առնչությամբ։

«Ադրբեջանի ԶՈՒ` գլխավոր գերագույն հրամանատար, նախագահ Իլհամ Ալիևի, Զաքիր Հասանովի և այլ բարձրաստիճան զինվորական պաշտոնյաների հրամանատարությամբ, Թուրքիայի ղեկավարության հետ միասին ծրագրել և իրականացրել են ագրեսիայի ակտ, որի գործողությունները սկսվել են, երբ սկսվեցին կազմակերպվել և իրականացվել զորավարժություններ, որոնք տևել են մինչև օգոստոսի 10-ը։ Վարդանյանի խոսքով՝ նշված զորավարժությունների ավարտից հետո Թուրքիայի ԶՈՒ մեծաթիվ զինծառայողներ, այդ թվում՝ բարձրաստիճան սպաներ շարունակել են մնալ Ադրբեջանում՝ փաստացի համատեղ կազմակերպելով Ադրբեջանի ԶՈՒ համակարգումը և շարունակելով իրականացնել մարտական պատրաստության աշխատանքները։ Ադրբեջանի և Թուրքիայի ղեկավարության գործողությունների նախապես ծրագրման մասին է վկայում նաև վարույթն իրականացնող մարմնի կողմից ձեռք բերված փաստական տվյալներն առ այն, որ մինչև բուն ռազմական գործողություններ սկսելը՝ դեռևս սեպտեմբերի սկզբներին ԶՈՒ-երի ծառայողներին կոնկրետ հրաման է տրվել՝ պատրաստվել պատերազմի ԱՀ դեմ և արդեն սեպտեմբերի կեսերից Ադրբեջանը կազմակերպել և իրականացրել է մեծամասշտաբ զորահավաք»,- հայտարարել Է Վարդանյանը։

Բացի դա՝ Թուրքիայից ժամանած բարձրաստիճան զինվորականները զորամասերում անձամբ են իրականացրել և համակարգել մարտական պատրաստության դասընթացները և սեպտեմբերի 26-ին՝ նախքան բուն ռազմական գործողությունները սկսելը ԶՈՒ-երը հանվել են իրենց մշտական տեղակայման վայրերից, համապատասխան ռազմական տեխնիկայի համալրումներով տեղակայվել են Արցախա-ադրբեջանական շփման գծի երկայնքով, ավելին՝ մինչև լրիվ մարտական պատրաստության բերելը՝ շփման գծին հարող Ադրբեջանի խաղաղ, խիտ բնակեցված բնակավայրերում անմիջապես քաղաքացիական բնակիչների տների բակերում տեղակայվել են հրթիռահրետանային կայաններ։ Բացի դա՝ մինչև սեպտեմբերի 27-ը և դրանից հետո Ադրբեջանի ԶՈՒ-երը համալրվել են Իսրայելից, Թուրքիայից, Չեխիայից, Բելառուսից և այլ երկրներից ձեռքբերված ռազմական տեխնիկայով։

Աղբյուր` Փաստինֆո