Փաստ ինֆո

Բոլոր նրանց համար, ովքեր դեռ կարծում են ու սին հույսեր են տածում, թե կառուցողական փոխզիջման միջոցով լեզու են գտնվելու մեզ ոչնչացնելու ցանկություն ունեցողի հետ՝ ամենաքիչը, որ կարող եմ անել՝ ցավալն է այդպես կարծողի համար։ ԱԺ-ում նման հայտարարությամբ է հանդես եկել «Լուսավոր Հայաստան» խմբակցության պատգամավոր Աննա Կոստանյանը՝ նշելով, որ թշնամին ինչպես երեկ, այսօր և միշտ, և երբեք չի փոխվում, միշտ նույնն է ու չի փոխվել։ 

Պատգամավորն ընդգծեց, որ այսօր չեն կարող խոսել ճկուն կառուցողականությունից, երբ շատ հստակ գիտեն, որ Ադրբեջանը պատրաստ չի եղել ու հիմա էլ պատրաստ չէ փոխզիջման, ուստի՝ ինչպե՞ս են հայտարարում հայ ժողովրդի՝ այն էլ ցավոտ փոխզիջումների պատրաստակամության մասին։ Պատգամավորն ընդգծեց՝ հայկական կողմն ագրեսորի հետ փոխզիջումների մասին խոսելու իրավունք չունի։

Նրա խոսքով՝ մենք 90-ականներն անցած արցախյան գոյամարտում թրծված, հաղթանակած պետության սերունդն ենք և պետք է խոսենք բացառապես հաղթողի դիրքից, ոչ մի դեպքում՝ պարտվածի ձայնով։

«Հայ ժողովրդին՝ մեծից փոքր, ջահել ու ահել, մեր ու մանուկ հարցրե՞լ ենք արդյոք, թե պատրաստ են որևիցե փոխզիջման, հետն էլ ցավոտ։ Ինչի՞ դիմաց։ Իսկ որդեկորույս մայրերը, հայրերը, քույրերն ու եղբայրները պատրաստ են արդյոք հայրենի հողի վրա թափած զավակի արյունը կորցնել ու՝ հանուն ինչի»,- հայտարարեց Կոստանյանը՝ բարձրաձայնելով մի շարք հարցեր, մասնավորապես, փոխզիջում բառը լսող մարտիկն ինչպե՞ս կարող է կռվի գնալ, հիվանդանոցում կյանքի ու մահվան կռիվ տվող տղաներին հարցրե՞լ են, իսկ մարտի դաշտում հայրենիքի փրկության գործը կիսատ չթողած հավատն աչքերում ընկած հայի հոգու առաջ պատասխան տալու՞ են։

Նրա խոսքով՝ պատերազմի մասնակիցների թերությունների մասին հրապարակավ խոսելու կամ պարսավանքի ենթարկելու փոխարեն կան օրենքով սահմանված պատասխանատվության շատ հստակ միջոցներ, որոնք կարող են կիրառել պետության դեմ դավաճանական կամ կասկած հարուցող քայլ կատարած անձի նկատմամբ, բայց դրա մասին բնավ էլ պարտադիր չէ ի լուր աշխարհի խոսել։ Պատգամավորը գտնում է, որ դավաճաններ պետք է փնտրել լուռ, ոչ հրապարակավ, որովհետև դավաճաններ ունենալու միտքը միայն հուսալքում և կոտրում է հաղթական ոգին, իսկ մարդկանց մեղադրելը շատ հեշտ է, բայց ցայսօր դեռ խնդիրներ չեն լուծվել։ Պատգամավորն ընդգծեց, որ այսօր մեր միակ ուղերձը, որը պետք է հղենք՝ հանուն հայրենիքի հաղթելը պետք է լինի, ոչ թե՝ զոհվելը։

«Յուրաքանչյուր ընկած զինվորի արյունը մեզ պետք է նոր ոգով մարտնչելու, հաղթելու դրդի, և ոչ մի դեպքում՝ թուլության, հուսահատության, կամ հանձնվելու»,- ընդգծեց Կոստանյանը։

Աղբյուր` Փաստինֆո