Փաստ ինֆո

Եթե ազգովի՝ Հայաստանում, Սփյուռքում, կին, տղամարդ կանգնեցինք, մենք Ադրբեջանի հետ կկարողանանք կառուցողական երկխոսություն ծավալել, չկանգնեցինք, ուրեմն փախչելու տեղ էլ չի լինի։ Սա է ամենակարևորը։ Այս մասին ֆեյսբուքյան ուղիղ եթերում ասաց Նիկոլ Փաշինյանը։

«Մենք մեր շահերի եզրագծին ենք գտնվում»,- ասաց նա՝ հիշեցնելով ԱԱԾ տարածած հաղորդագրությունը, որի համաձայն՝ բժիշկը և քաղաքացին համաձայնության են եկել, որ կորոնավիրուսով հիվանդ լինելու հիմքով մարդը խուսափի զորահավաքից։

«Մինչև մեր հանրության մեջ այս դեպքերի շուրջ չի ձևավորվել հստակ, անառարկելի, դատապարտելի մթնոլորտ, որ այդ մարդը հետո ամաչի ուղղակի փողոց դուրս գալ։ Այստեղ է պրոբլեմների պրոբլեմը։ Հիմա մեկը՝ էկրանների մոտ նստած, ինձ օրինակ կարող է ասել՝ այ կաբինետում նստել ես, դու գնա առաջնագիծ։ Էլի գնամ առաջնագիծ, ինչ-որ մեկը պետք է այստեղ նստի։ Եթե պահանջն այն է, որ ես պետք է այստեղից գնամ, եթե իմանամ, որ դա է ժողովրդի ուզածը, դա էլ կանեմ»,- ասաց Փաշինյանը՝ հավելելով, որ, եթե ինչ-որ ռազմական և այլ անհաջողությունների մասին է խոսվում, հիմքը պետք է փնտրել այստեղ, որ այսօր կա բժիշկ և կա քաղաքացի, որոնք համաձայնության են գալիս, որ կորոնավիրուսի վերաբերյալ կեղծ տեղեկանք տրվի, ընդ որում, բացահայտվել է միայն այդ դեպքը, բայց որքան դեպք կա այդպիսին, իսկ այդպիսի դեպքերի արդյունքում բաց են մնում մեր զինվորների թիկունքները, հատկապես այն զինվորների թիկունքը, որոնք հերոսի նման կռվում են, մենք այդ մարդկանց դավաճանում ենք։

«Ասում են՝ դավաճաններ չփնտրեք, չփնտրենք, բայց այն, ինչ տեղի է ունենում դավաճանություն է, որովհետև հնարավոր է այդ մեկ կեղծ տեղեկանքով մարդը կարող էր զինվորին հաց հասցներ, փամփուշտ հասցներ, մեջքը պահել, բայց դա տեղի չի ունեցել»,- ասաց Փաշինյանը՝ հավելելով, որ կշարունակեն աշխատել, կլինեն մաքսիմալ ճկուն։

Փաշինյանն ընդգծեց, որ այսօր մեր ժողովրդի ճակատագիրն է որոշվում և չկա ճակատագրի լուծման ավելի լավ տարբերակ, քան՝ ճակատագրի ղեկը սեփական ձեռքերը վերցնելը։

Նրա խոսքով՝ Ադրբեջանը ցանկանում է Ղարաբաղի կապիտուլյացիան, Ղարաբաղը՝ չի ուզում, նման խնդիր չունի դրած և հայ ժողովուրդը պետք է այնպես աջակցի Ղարաբաղին, որ Ադրբեջանը Ղարաբաղի կապիտուլյացիան չցանկանա։

Վերջինիս խոսքով՝ զինկոմիսարիատի մոտ պետք է հերթեր լինեն 24 ժամ։

«Ես, անկեղծ ասած, կուզենայի, որ բոլորդ ամեն ինչ իմանայիք կատարվողի մասին, բոլոր մանրամասները, առաջնագծի վիճակը, բայց իմ շատ գործընկերներ ինձ ամեն օր հետ են պահում նման բանից, որովհետեւ ի վերջո ռազմական դրություն է, մենակ մենք չենք իրար լսում, ներքին խոսակցության հնարավորություն չկա, թե չէ շատ ավելի բաց ու պարզ կխոսեի։ Ես շատ եմ նեղվում, որ ինչ-որ պահի ամբողջական ինֆորմացիա չենք տալիս ժողովրդին»,- ասաց նա՝ հավելելով, որ երբեմն՝ նեղվում է, որ ամբողջական ինֆորմացիա ժողովրդին չի տրամադրվում և պարզաբանեց, որ դա պայմանավորված է ռազմական դրության առանձնահատկություններով։

Աղբյուր` Փաստինֆո