Փաստ ինֆո

Հերթական անգամ չստացվեց պահպանել հրադադարը։ Իհարկե՝ չեմ կարող ասել, թե ինչպիսին կլինի ԵԱՀԿ Մինսկի խմբի համանախագահող երկրների և նախագահների արձագանքը դրան։ Այս մասին ֆեյսբուքյան ուղիղ եթերում ասել է վարչապետ Նիկոլ Փաշինյանը։

Վարչապետը նշեց, որ պետք է իմանաք, որ հայկական կողմն ամեն ինչ արել է. որ հրադադարը պահպանվի և, ըստ էության, ՊԲ-ն առավոտվանից շատ զսպված է եղել, բայց այնուամենայնիվ, օրվա երկրորդ կեսին կարող ենք արձանագրել, որ հրադադարը չհաջողվեց պահպանել արդեն երրորդ անգամ։ Փաշինյանը հիշեցրեց, որ առաջին անգամ հրադադարի համաձայնություն ձեռք էր բերվել ՌԴ նախագահի, երկրորդ անգամ՝ Ֆրանսիայի նախագահի, իսկ երրորդ անգամ՝ ԱՄՆ նախագահի միջնորդությամբ։ Ավելին՝ ԱՄՆ նախագահը երեկ վստահություն էր հայտնել, շնորհավորել էր ՀՀ վարչապետին և Ադրբեջանի նախագահին՝ հրադադարի հաստատման կապակցությամբ։

Վարչապետի խոսքով՝ դեռևս հայտնի չէ, թե ինչպես ԱՄՆ նախագահն ինչպես կարձագանքի հրադադարի տապալմանը, բայց կեսգիշերն անց հեռախոսազրույց է ունեցել ԱՄՆ պետքարտուղար Մայք Պոմպեոյի հետ, եւ ուղիղ ասել, որ սա իրենց համար առաջին հրադադարն է, բայց մեզ համար արդեն երրորդը և ինքը կարող է մոտավորապես կանխատեսել, թե ինչ է տեղի ունենալու, որ մեծ հավանականությամբ հրադադարը չի պահպանվի և Ադրբեջանը կասի, որ հայկական կողմն է խախտել հրադադարը։

«Բայց հիմնական հարցը, որ դնում էի ԱՄՆ պետքարտուղարի առաջ, հետեւյալն է՝ եթե հրադադարը չպահվի, ինչպես եք պարզելու, թե ով է մեղավորը և երկրորդը՝ ինչ հետեւանքներ է ունենալու հրադադարի խախտումը՝ խախտող կողմի համար»,- նշեց Փաշինյանը՝ հավելելով, որ կոռեկտ չի համարում ասել,թե ինչ է պատասխանել ԱՄՆ պետքարտուղարը, սակայն հույս ունի, որ ԱՄՆ-ն կպատասխանի հարցին։

«Պատկերացնո՞ւմ եք մի իրավիճակ, երբ ՌԴ, ԱՄՆ, Ֆրանսիայի նախագահների ջանքերը՝ հրադադար հաստատելու եւ հարցին դիվանագիտական լուծում գտնելու ջանքերն անցնում են ապարդյուն։ Ընդ որում՝ խնդրում եմ՝ որեւէ մեկը չկասկածի երեք նախագահների անկեղծությանը՝ հրադադար հաստատելու վերաբերյալ։ Երեք նախագահներն ամենայն անկեղծությամբ են ուզում՝ հրադադարը հաստատվի, առանց որեւէ կասկածի կարող եմ ասել»,- նշեց Փաշինյանը՝ ընդգծելով, որ այս տերությունների ղեկավարներն իրենց անունն են դնում այդ հրադադարի ջանքերի տակ, եթե ուրիշ բան հաշվի չառնենք, միայն այս փաստը պարզ է՝ հասկանալու, որ նախագահներն անկեղծորեն են ուզում հասնել հրադադարի։

Աղբյուր` Փաստինֆո