Փաստ ինֆո

Այս ողջ ընթացքում մենք եղել ենք մաքսիմալ ճկուն և եկել ենք այն եզրակացության, որ Ադրբեջանը ոչ թե հարցի կարգավորումն է ուզում, այլ՝ Ղարաբաղի ամբողջական կապիտուլյացիա։ Այս մասին ֆեյսբուքյան ուղիղ եթերում ասաց ՀՀ վարչապետ Նիկոլ Փաշինյանը։

«Այնտեղ, որտեղ մենք որեւէ ճկունություն ենք ցուցաբերել, դա ընդունելի չի եղել Ադրբեջանի համար։ Եթե մենք որեւէ բանի համաձայնվել ենք, դա արդեն ընդունելի չէ եղել Ադրբեջանի համար, որովհետեւ նրանց ցանկացել են ավելին՝ քաջալերված լինելով Թուրքիայի կողմից, թե ոչ, դա այս պահին էական չէ։ Այսպիսով՝ մեր արձանագրումն այն է, որ Ադրբեջանը հիմա առավել եւս ոչ թե Ղարաբաղի հարցի կարգավորում է ուզում, այլ առնվազն Ղարաբաղի կապիտուլյացիա»,- նշեց Փաշինյանը։

Վարչապետը հայտարարեց, թե հայ ժողովուրդը պատրաստ է նույնիսկ ցավոտ փոխզիջումների, բայց ժողովուրդը ոչ մի պարագայում պատրաստ չէ կապիտուլյացիային և հայ ժողովուրդը պետք է ռեսուրսներ գտնի՝ դիմակայելու և իր իրավունքները պաշտպանելու։ Նրա խոսքով՝ հաշվի առնելով նաև մեզնից ակնկալվող միջազգային ճկունությունը, մենք, այնուամենայնիվ, պետք է ուժ ունենանք՝ գործել մեր շահերի եզրագծերին մոտիկ, բայց անհնար է պատկերացնել, որ հայ ժողովուրդը գնա կապիտուլյացիայի։

Փաշինյանը նշեց, որ մենք պետք է գտնենք ռեսուրսներ, որպեսզի կարողանանք մեր շահերը պաշտպանել և կարողանանք իրավիճակը դարձնել այնպիսին, որ Ադրբեջանի պահանջը լինի ոչ թե Ղարաբաղի կապիտուլյացիան, այլ փոխզիջումը, որ Ադրբեջանի համար ընդունելի լինի փոխզիջումային տարբերակը։ Նրա կարծիքով՝ սա է այն կարեւոր պրոբլեմը, որ մինչ օրս թույլ չի տվել լուծել Ղարաբաղի հարցը, որովհետեւ Ադրբեջանը պատրաստ չի եղել եւ հիմա առավել եւս պատրաստ չէ փոխզիջման։

Աղբյուր` Փաստինֆո