Փաստ ինֆո

«Վերջին շրջանում շատ է խոսվում գոյաբանական պայքարի՝ Թուրքիայի կողմից ցեղասպանության շարունակական վտանգի մասին։ Մենք պատմաբաններս ու թուրքագետներս բազմիցս բարձրաձայնել ենք, որ հանձինս մեր արևելյան և արևմտյան հարևանների, մենք գործ ուենենք ցեղասպան երկու պետությունների հետ,- այսօր ասուլիսում ասել է պ.գ. դ պրոֆեսոր, պատմաբան Արմեն Մարուքյանը։ Նրա դիտարկմամբ՝ Թուրքիայի ցեղասպանական ձեռագրի վերաբերյալ ակնհայտ փաստեր են Հայոց ցեղասպանության, այնուհետև նաև մշակութային եղեռնի իրագործումը։ «Թուրքական ցեղասպանական ձեռագրի վերջին դրսևորումներից մեկը եղավ 2014 թվականի մարտին նույն այս ահաբեկչական խմբավորումների միջոցով իր տարածքից հայկական Քեսաբի վրա հարձակումը։ Սա շատ խոսուն փաստ է, ապացուցում է, որ Թուրքիան ահաբեկիչների հետ մշտապես գործակցող պետություն է, որ ահաբեկիչներին օգտագործում և հատուկ կերպով ուղարկում է հենց հայ բնակչության դեմ։ Այդ նույն ահաբեկիչներին Թուրքիան հիմա տեղափոխել է արցախյան շփման գիծ»,- նշել է պատմաբանը։

Անդրադառնալով ադրբեջանական ֆակտորին, պատմաբանը նկատում է՝ մուսաֆաթական Ադրբեջանը տարիներ շարունակ հանձն է առել պանթուրքիստական ցեղասպանության ծրագրի շարունակական իրականացնողի դերը, որի վառ ապացույցներն են՝ 1918-ի սեպտեմբերին Բաքվի հայերի կոտորածը, 1919-ի հունիսին և 1920-ի մարտին Շուշիի հայերի բնաջնջումը, 1988-ին Սումգայիթի հայերի կոտորածը, 1989-ին Կիրովաբադի և Բաքվի, իսկ 1992-ին Մարաղայի դեպքերը։ Այսքանից հետո, հաշվի առնելով նաև այսօրվա զարգացումները, պատմաբան Արմեն Մարուքյանը կարծում է, որ Ազգային Ժողովը պետք է քաղաքական գնահատական տա՝ ընդունելով որոշ բանաձևեր, որտեղ վերոհիշյալ կոտորածներն անվանելով ջարդեր, վերանայի երևույթն՝ իրերին տալով համապատասխան անուններ, որոնք ոչ այլ ինչ են, քան ցեղասպանության շարունակություններ։ «Ինչո՞ւ եմ ես սա պնդում, որովհետև բանակցային սեղանին և այլուր մենք տեսնում ենք, թե ինչ ենթատեքստով է Ադրբեջանը հիշատակում նույն Խոջալուի դեպքերը, այնինչ մենք, ինքներս շատ լավ գիտենք, թե ինչ է իրականում կատարվել այնտեղ։ Այլևս ակնհայտ է, որ այս պահին Ադրբեջանն ու Թուրքիան խոսքից անցել են գործին, որը ոչ այլ ինչ է, քան գոյաբանական պայքար, այլ կերպ ասած՝ Ցեղասպանություն։ Միջազգային հանրությանը Ադրբեջանի կողմից հայ բնակչության նկատմամբ իրականցվող գործունեությունն այլևս պետք է հստակ կոչել իր անունով՝ սա ցեղասպանություն է»,- ասաց պատմաբան Արմեն Մարուքյանը։

Աղբյուր` Փաստինֆո