Փաստ ինֆո

«Եթե հետևանքների արդյունքը գալիս է ընկալումներից, ապա Թուրքիային ոչինչ չի սպառնում, անգամ եթե նա երրորդ անգամ, Ադրբեջանի ձեռքով ապտակում է միջազգային հանրությանը կամ համանախագահող երկրներին։ Եթե Թրամփի համար Էրդողանի պատասխանը լինելու է որպես լուրջ ընկալում, ապա ԱՄՆ անպայման գործուն քայլեր կկիրառի, ինչպես եղավ քահանայի պարագայում, երբ ԱՄՆ-ի հստակ դիրքորոշման արդյունքում, ընդամենը երկու օր անց Էրդողանը հետքայլ կատարեց։

Այսօրվա դրությամբ ոչինչ ասել չեմ կարող,-«Փաստինֆո»-ի հետ զրույցում ասում է քաղաքագետ Թևան Պողոսյանը, վերլուծելով երրորդ անգամ հրադադարի պայմանավորվածությունը խախտած ադրբեջանական կողմի վարքագիծը, որի հրահրող կողմը բոլորին հայտնի Թուրքիան է։

Եթե համանախագահող երկրների, տվյալ դեպքում՝ ԱՄՆ-ի շահերից բխի Թուրքիային պատժելու հեռանկարը, ապա նա դա անպայման կանի, բայց եթե Թրամփի համար սա ընդամենը նախընտրական ժամանակահատվածի խնդիր է՝ իր շահերից ելնելով, ապա ոչինչ սպասել պետք չէ։ Իսկ ի՞նչ արեց Ռուսաստանի Դաշնությունը՝ հոկտեմբերի 10-ից ի վեր։ Երբ մենք գործուն քայլեր կտեսնենք այս երկրների կողմից, այն ժամանակ Ադրբեջանն ու Թուրքիան կհասկանան, որ իրենք անպատժելի չեն։ Ֆրանսիան փորձեց գործուն քայլերի գնալ, բայց պարզվեց, որ այսօրվա դրությամբ նույն Եվրոպական միությունում ներմիութենական հարաբերություններում նույնիսկ Ֆրանսիային, Հունաստանին և Կիպրոսին չեն հարգում։ Փաստորեն ստացվում է, որ օրինակ նույն Գերմանիան կամ Անգլիան նախընտրում են Թուրքիայի հետ գործ ունենալ, քան իրենց մեջ գործող երկրների կամ սեփական արժեքների»,- նկատում է քաղաքագետը։

Ի՞նչը կստիպի Թուրքիային դուրս գալ անպատժելիության մթնոլորտից և վերանայել անկանխատեսելի պահվածքը հարցին, Թևան Պողոսյանը պատասխանում է՝ միայն հզորացող և զարգացող Հայաստանը.«Երբ մենք մեր հետևանքների մասին ենք խոսում, ապա պետք է գիտակցենք, որ դա գալու է մեր ունակություններից։ Եթե մենք, կփոխենք, աշխարհով մեկ սփռված 10 մլն.-ով կդառնանք մեկ ազգ – բանակ, կպահենք մեր միասնականությունը և ռազմական, դիվանագիտական, տնտեսական, լրատվական և տեղեկատվական դաշտում մեր շահերն առաջ տանելով, թիրախային հարվածներն այնպես խփենք, որը ռեալ իրավիճակ կփոխի, այն ժամանակ կստանանք մեզ համար շահեկան հետևանքներ։ Աշխարհն ուժեղի կողմն է կանգնելու»։

Խոսելով այն մասին, թե ի՞նչ գործուն քայլեր է պետք կատարել հիմա, այս իրավիճակում դիվանագիտական դաշտում, Թևան Պողոսյանը պատասխանում է.«Հիմա մեր հարևան և ոչ միայն հարևան երկրներին պետք է կարողանանք ճիշտ ներկայացնել և բացատրել, թե ի՞նչ իրենք կարող են կորցնել, Հարավային Կովկասում Թուրքիայի՝ թուրանական նկրտումները չզսպելու արդյունքում։ Երբ մեզ սա կհաջողվի, թե՛ համանախագահող երկրները, թե՛ մնացյալ պետությունները հաշվի կնստեն մեզ հետ, ինչպես որ դա Թուրքիայի կոչով արեցին իսլամական երկրները՝ Ֆրանսիայի նկատմամբ, ընդամենը վերջին մի քանի ժամվա ընթացքում»,- ասում է քաղաքագետը՝ «Փաստինֆո»-ի հետ զրույցում։

Հեղինակ՝ Նվարդ Մանվելյան

Աղբյուր` Փաստինֆո