Փաստ ինֆո

Շարժման գլխավոր գաղափարը տվեցին Արցախի կանայք, արցախցի մայրերը, քույրերը, որոնք իրենց բալիկների հետ այսօր ժամանակավորապես բնակչություն են հաստատել Երևանում։ Այս մասին հրավիրված ասուլիսի ընթացքում ասել է «Արցախի կանանց նախաձեռնող» խմբի անդամ Իրինա Սաֆարյանը։

Սաֆարյանը պատմում է, որ մոտ մեկ շաբաթ առաջ զանգ է ստացել, որը ցանկություն է հայտնել միախմբվելու և շարժումը սկսելու, քանի որ այլևս անհնար է լռել։
«Միգուցե հենց այսպես պետք է ներկայացնենք Արցախում տիրող այն ողջ ահաբեկչական գործողությունները և մարդասպան գործողությունները, ցեղասպան գործողությունները, որոնք իրականացվում են Թուրքիայի կողմից՝ քողարկված Ադրբեջանի փեշի տակ»,- ասաց նա։

Սաֆարյանը նշեց, որ իրենցից լավ Արցախում տիրող իրավիճակը ոչ ոք չի կարող ներկայացնել։ Առաջին արված քայլը եղել է ՀՀ-ում Մակ-ի գրասենյակի դիմաց ցույցը, չեն հասցրել նույնիսկ պաստառներ տպել և այդ ամենն արել են երեխաները՝ իրենց ձեռքերով։ Նախաձեռնող խմբի անդամներից Սիրանուշ Սարգսյանը, անդրադառնալով ԱՄՆ-ի դեսպանատան դիմաց իրականացվող ցույցերին, նշեց, որ ընտրությունը պատահական չէ, որովհետև ԱՄՆ-ն ԵԱՀԿ Մինսկի խմբի անդամ երկիր է և կրում է պատասխանատվություն՝ արցախյան հակամարտության կարգավորման դեպքում։ Բացի դա՝ ԱՄՆ-ն, ինչպես և Թուրքիան, ՆԱՏՕ անդամ պետություն է և որևէ մեկի համար գաղտնիք չէ, որ հենց ամերիկյան զինատեսակներն են այսօր օգտագործվում Արցախի խաղաղ բնակչության դեմ, ինչը հակասում է իրենց օրենսդրությանը։

Ինչ վերաբերում է ԱՄՆ-Ադրբեջան հարաբերություններին, Սարգսյանը նշեց, որ այն երկրները, որոնց դեսպանատների դիմաց իրենք ակցիաներ կիրականացնեն, կարվեն հենց համագործակցության համատեքստում և իրենք շեշտում են, թե ինչքանով է ներգրավված պետությունը Ադրբեջանի՝ իր ռազմական օգնության տրամադրման հարցում և ինչպես է հետագայում դա օգտագործվում խաղաղ բնակչության դեմ։ «Մեր պահանջը՝ ԵԱՀԿ անդամ ԱՄՆ-ից և մյուս անդամ երկրներից այն է, որ նրանք ճանաչեն Արցախի Հանրապետությունը»,- ասաց նա՝ պարզաբանելով, որ դա ոչ թե իրենց ցանկությունն է, այլ՝ միակ տարբերակն է։

Նրա խոսքով՝ Ադրբեջանին և Թուրքիային զսպելու միակ տարբերակը Արցախի Հանրապետության ճանաչումն է, կոնկրետ սանկցիաներ կիրառվեն Թուրքիայի դեմ և առնվազն համատեղ հայտարարություն տարածեն։

Աղբյուր` Փաստինֆո