Փաստ ինֆո

«Վաղուց անվիճելի հարց է այն, որ հայկական կողմը երբեք առաջինը կրակ չի բացում։ Մենք, իհարկե, ծանոթ ենք Ադրբեջանի նախագահի երեկ տված հարցազրույցին, որտեղ նա ասում է, թե հրադադարի կգնա այն պայմանով, եթե հայկական կողմը կրակը դադարեցնի, բայց մենք չենք կրակ բացում, մենք պատասխանում ենք նրանց բացած կրակին, այս մասին քիչ առաջ «Փաստինֆո»-ին ասաց Արցախի նախագահի խորհրդական Դավիթ Բաբայանը, մեկնաբանելով նախագահ Ալիևի վերջին հայտարարությունը:

Նշենք, որ Ադրբեջանի նախագահը Le Figaro թերթին տված հարցազրույցում հայտարարել է, թե պատրաստ են կրակը դադարեցնել, եթե հայկական կողմը եւս դադարեցնի:

«Երեկ ողջ գիշեր ակտիվ հրետակոծման է ենթարկվել Արցախի մայրաքաղաք Ստեփանակերտը՝ 10-15 արկ է ընկել քաղաքի վրա, չեն դադարել ինտենսիվ հրետակոծությունները նաև Ասկերան,Մարտակերտ, Մարտունի քաղաքների վրա։ Իսկ եթե մեր պատասխան կրակից տուժում են նրանց խաղաղ բնակիչները, ապա դրա օբեկտիվ պատճառն այն է, որ ադրբեջանական կողմն իր ռազմական տեխնիկան տեղակայում է հենց քաղաքացիական ենթակառուցվածքների կողքին և մենք այս մասին մեկ անգամ չէ, որ բարձրաձայնել ենք տարբեր հարթակներում»,- ասում է Արցախի նապագահի խորհրդականը։

Հիշեցնենք, որ սեպտեմբերի 27-ին Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում է նաեւ Թուրքիան, վարձկան-ահաբեկիչներ՝ Սմերչ, Պոլոնեզ, թուրքական Կասիրգա եւ այլ զինատեսակներով հրթիռակոծելով խաղաղ բնակավայրերը, այդ թվում մայրաքաղաք Ստեփանակերտը։ Երկու անգամ կրակի դադերցման վերաբերյալ պայմանավորվածություն է ձեռք բերվել` առաջինը Ռուսաստանի, երկրորդը` Ֆրանսիայի ակտիվ ջանքերի շնորհիվ ու երկու դեպքում էլ Ադրբեջանը խախտել է դրանք:

Աղբյուր` Փաստինֆո