Փաստ ինֆո

Հակամարտությունը Լեռնային Ղարաբաղում շարունակվում է ՝ չնայած տարբեր երկրների՝ պատերազմը դադարեցնելու և հարցը դիվանագիտական միջոցներով լուծելու կոչերին: Ռազմական փորձագետները նշում են, որ այժմ պատերազմը հասել է այնպիսի եռման կետի, երբ տեղական ռազմական որոշակի հաջողությունները չափազանց թանկ են յուրաքանչյուր կողմի համար:

«Военное обозрение»-ը արձանագրելով, որ պատերազմն սկսել է Ադրբեջանը, հաղորդում է, որ Երևանի և Բաքվի հրապարակած վիճակագրության համաձայն` կորուստները չափազանց մեծ են 21-րդ դարի հակամարտության համար, նախևառաջ, երբ խոսքը վերաբերում է կենդանի ուժին: Չնայած առճակատման գոտում անօդաչուների ակտիվ օգտագործմանը, վերջինս չի հանգեցնում անձնակազմերի կորուստների նվազմանը, և, հնարավոր է, հակառակը ՝ կորուստները բազմապատկվում են:

Ընդ որում, ինչպես հայկական, այնպես էլ՝ ադրբեջանական կողմերը կորցնում են, իրենց զորքերի էլիտային, այդ թվում `մարտական գոտի նետված հատուկ ստորաբաժանումների զինվորներին:

Հասկանալի պատճառներով հակամարտության կողմերը երկուստեք մատնանշում են թշնամու կորուստների բարձր մակարդակը ՝ նախընտրելով լռել սեփականի մասին: Բայց միանգամայն ակնհայտ է, որ երկու կողմն էլ կորուստներ են կրում, և այդ կորուստներն իսկապես մեծ են:

Հայաստանի Պաշտպանության նախարարությունը որոշել է տեսանյութ հրապարակել, որտեղ ներկայացված են մարտական գոտուց չվերադարձած ադրբեջանցի զինծառայողների լուսանկարների արագ փոփոխվող շարքերը: Միևնույն ժամանակ պնդում են, որ Ադրբեջանի զինված ուժերում կենդանի ուժի կորուստները հասել են 10 հազարի: Ադրբեջանի իշխանությունները խոստացել են պաշտոնապես տեղեկացնել իրենց կորուստների մասին՝ «ռազմական գործողությունների ավարտից հետո»: Իսկ թե երբ կավարտվեն ռազմական գործողությունները, մնում է առկախ:

Փորձագետները կարծում են, որ հակամարտության մեջ առկա երկար տարիներ ձգվող ազգամիջյան գործոնը բացասական դեր է խաղում և դրանով են պայմանավորում կողմերի՝ փոխզիջման չգնալը, ինչն էլ, ըստ դիտարկումների՝ հանգեցնում է մարտական գոտում մեծաքանակ կորուստների, որը բնորոշ չէ ժամանակակից միջպետական պատերազմներին (իրականում հենց միջպետական պատերազմի հետ գործ ունենք խմբ.), երբ հրամանատարությունն առաջին հերթին փորձում է փրկել անձնակազմին:

Ըստ «Военное обозрение» կայքի՝ ղարաբաղյան հակամարտությունում խաղադրույքը չի դրվում անձնակազմերի խնայողության վրա:

Աղբյուր` Փաստինֆո