Փաստ ինֆո

Նայելով ընդհանուր իրավիճակին՝ կարող ենք ասել, որ երկու հրադադարների դեպքում էլ Ադրբեջանի խախտումները հրահրված են Թուրքիայի կողմից,- այս մասին «Փաստինֆո»-ի հետ զրույցում ասաց թուրքագետ Անդրանիկ Իսպիրյանը:

Հիշեցնենք, որ հոկտեմբերի 10-ին Հայաստանի, Ռուսաստանի և Ադրբեջանի ԱԳ նախարարների հանդիպման ընթացքում, որոշում կայացվեց կողմերի միջև հաստատել հրադադարի ռեժիմ: Կողմերի միջև երկրորդ անգամ զինադադարի մասին հայտարարվեց հոկտեմբերի 17-ին, ըստ որի արդեն ֆրանսիական կողմի միջնորդությամբ՝ հոկտեմբերի 18-ից դադարեցնելու էին կրակը, սակայն երկու դեպքում էլ, հակառակորդը խախտելով հրադադարը, որոշման ուժի մեջ մտնելուց ընդամենը րոպեներ անց շարունակել է կրակը՝ թիրախավորելով խաղաղ բնակիչներին:

Մեզ հետ զրույցում թուրքագետ Անդրանիկ Իսպիրյանը նկատեց, որ սա միանշանակ պայմանավորված է թուրքական կողմի հրահրմամբ.
«Ադրբեջանում և Թուրքիայում այն կարծիքին են, որ, ռազմական գործողությունները դադարեցնելով, Հայաստանը հնարավորություն կունենա վերազինվել, համախմբվել, և իրենք չեն կարողանա ոչինչ անել, ուստի փորձում են շարունակվող ռազմական գործողություններով թուլացնել Հայաստանը, սակայն դա ընդամենը իրենց թյուր կարծիքն է»,- ասաց փորձագետը:

Զրուցակցի դիտարկմամբ՝ սա կարող է դիտարկվել արհամարհական վերաբերմունք Մինսկի խմբի գործունեությանը, ինչպես նաև Ռուսաստանի հանդեպ, քանի որ հրադադարի անմիջական միջնորդը հենց Ռուսաստանն է:

Մեր այն հարցին՝ թե այդ դեպքում ինչու՞ համանախագահող երկրները համարժեք պատասխան չեն տալիս Բաքվի այս վարքագծին, բանախոսը պատասխանեց, որ համանախագահող երկրները տարբեր բևեռներում են և ունեն տարբեր շահեր տարածաշրջանում.
«Ռուսաստանը միջնորդ լինելուց բացի՝ նաև Հայաստանի ռազմավարական դաշնակիցն է և խուսափում է Ադրբեջանի հասցեին հրապարակային սպառնալիքներից, քանի որ դա կարող է այլ կերպ ընկալվել Թուրքիայի և ՆԱՏՕ-ի կողմից, սակայն չերևացող հարթություններում, կարծում եմ, կլինեն քայլեր Ադրբեջանի դեմ»:

Զրուցակիցը Արցախի անկախության ճանաչումը Մինսկի խմբի համանախագահ երկրների կողմից իրատեսական չի համարում, սակայն կարծում է, որ քայլերն այս ուղղությամբ պետք չէ թուլացնել, քանի տարբեր երկրների հանձնաժողովներ և քաղաքներ արդեն սկսել են ճանաչման գործընթացը:

Անդրադառնալով Ալիևի այն հայտարարությանը, որ Ադրբեջանը ոչ մի դեպքում կողմ չի լինելու Արցախի ինքնորոշման հանրաքվեին՝ փորձագետը ասաց.

«Ալիևը նոր բան չի ասել, սակայն այս պահին լուծման այլ այլ տարբերակ չի քննարկվում»:

Աղբյուր` Փաստինֆո