Փաստ ինֆո

Ադրբեջանի վարքագիծը տրամաբանական ագրեսիվ է, որովհետև, փաստացի, Ալիևը ամեն ինչ՝ իր իշխանությունը, երկրի ներսում կայունությունը, ստաբիլությունը դրել է որպես խաղադրույք այս պատերազմում»,- «Փաստինֆո»-ի հետ զրույցում ասաց ադրբեջանագետ Անժելա Էլիբեգովան:

Հիշեցնենք, որ արդեն մեկ ամիս է, ինչ Արցախի սահմանագծով ընթանում են ակտիվ ռազմական գործողություններ՝ սանձազերծված թուրք-ադրբեջանական տանդեմի կողմից։ Հոկտեմբերի 10-ին Մոսկայում տեղի ունեցած Հայաստանի, Ռուսաստանի և Ադրբեջանի ԱԳ նախարարների հանդիպումից հետո հայտարարվեց հումանիտար հրադադարի մասին, ինչը խախտվեց Ադրբեջանի կողմից: Կողմերի միջև երկրորդ անգամ զինադադարի մասին հայտարարվեց հոկտեմբերի 17-ին, ըստ որի արդեն ֆրանսիական կողմի միջնորդությամբ՝ հոկտեմբերի 18-ից դադարեցնելու էին կրակը, սակայն երկու դեպքում էլ, հակառակորդը, խախտելով հրադադարը, որոշման ուժի մեջ մտնելուց ընդամենը րոպեներ անց շարունակել է կրակը՝ թիրախավորելով խաղաղ բնակիչներին:

Փորձագետը մեզ հետ զրույցում նկատեց, որ հայկական կողմը պետք է պատրաստ լինի Ադրբեջանի ագրեսիվ պահվածքին, որը կշարունակվի այնքան ժամանակ մինչև Ալիևը չզգա պարտությունը և դրա հետևանքները.

«Ադրբեջանը հնարավորինս խախտելու է բոլոր պայմանավորվածությունները, դրան պետք է լինել պատրաստ, որովհետև Ադրբեջանի ղեկավարը հիմա գնում է «վաբանկ» և մինչև լիովին չզգա հակազդեցությունը իր պարտության և դրա հետևանքների, ինքը շարունակելու է իր ագրեսիվ հռետորաբանությունը»:

Ադրբեջանագետը նաև նշեց, որ մինչև պատերազմի սկիզբը արդեն Ալիևը հայտարարել էր, որ Մինսկի խմբի գործունեությունը բավարար չէ, ուստի այս պահին Ալիևին ստիպել, որ նստի բանակցային սեղան և գնալ փոխզիջումների, կարելի է միայն ուժով:

«Ալիևը բանակցությունների կոնստրուկտիվ դաշտ վերադառնալու որևէ մտադրություն չունի ուստի մեր խնդիրն է Ալիևին ստիպել դա անել»,- վստահեցրեց զրուցակիցը:

Անդրադառնալով Արցախի անկախության ճանաչման հավանականությանը՝ փորձագետը նկատեց, որ Արցախի ԱԳՆ-ն փաստացի սկսել է մեկնարկել Արցախի անկախության ճանաչման գործընթացը, և տարբեր երկրներում սկսել են բարձրացնել այդ հարցը, ունենք փոքրիկ հաջողություններ այս ուղղությամբ:

«Մեզ համար Արցախի միջազգային ճանաչումը և Արցախի ներկայությունը բանակցային սեղանի շուրջ՝որպես երրորդ կողմ պետք է լինի առաջնային»,-ասաց Անժելա Էլիբեգովան:

Աղբյուր` Փաստինֆո