Փաստ ինֆո

ՌԴ նախագահն իր ելույթում արտահայտում է Ռուսաստանի դիրքորոշումը ղարաբաղյան խնդրի հետ կապված՝ թե որպես միջնորդ պետություն, թե որպես պետություն, որն ունի իր շահերը տարածաշրջանում,- այս մասին «Փաստինֆո»-ի հետ զրույցում ասաց քաղաքագետ Ալեքսանդր Մարգարովը:

Ինչպես տեղեկացրել ենք, երեկ ՌԴ նախագահ Վլադիմիր Պուտինը նախօրեին անդրադառնալով, Ղարաբաղյան հակամարտության շուրջ բանակցություններին , նշել էր՝ եթե դրանք 30 տարվա ընթացքում արդյունք չեն տվել, չի նշանակում, որ պետք է սկսել կրակել:

Մեկնաբանելով ՌԴ նախագահի այս դիրքորոշումը, մեր զրուցակիցը նշեց, որ դրանով դրսևորվել է ռուսական կողմի դիրքորոշումը, որ խնդիրը պետք է կարգավորվի միայն խաղաղ եղանակով և ռազմական ուղին տվյալ դեպքում պետք է բացառվի: «ՌԴ նախագահն իր ելույթում արտահայտում է Ռուսաստանի դիրքորոշումը ղարաբաղյան խնդրի հետ կապված՝ թե որպես միջնորդ պետություն, թե որպես պետություն, որն ունի իր շահերը տարածաշրջանում»,-ասաց քաղաքագետը:

Անդրադառնալով նաև ՌԴ նախագահի այն հայտարարությանը, որ խնդրի կարգավորման հարցով Ռուսաստանի դիրքորոշումը չի համընկնում Թուրքիայի հետ՝ փորձագետը նկատեց, որ այս դիրքորոշումը հնչել է բազմիցս թե՛ Մինսկի համանախագահող երկրների, թե՛ առանձին Ռուսաստանի կողմից:

«Ռուսաստանի համար անընդունելի է Թուրքիայի մասնակցությունը կոնֆլիկտին, ոչ էլ ընդունելի է այն մոտեցումը, որը հնչեցնում է Թուրքիան: Ռուսաստանի դիրքորոշումն այն է, որ բանակցությունների միջոցով կարելի է հասնել մի տարբերակի, որը հիմնված լինի փոխզիջումների վրա»,-ասաց փորձագետը:

Վերջինիս դիտարկմամբ՝ այս պահին առաջնային Արցախի անկախության ճանաչումն է, այն տեսանկյունից, որ Արցախը երբեք հանդես չի եկել Ադրբեջանի մաս և համապատասխանորեն, այս տարածքը չի կարող հանդես գալ մի էլեմենտ, որը այս կամ այն կերպ խախտում էր Ադրբեջանի տարածքային ամբողջականությունը:

Աղբյուր` Փաստինֆո