Փաստ ինֆո

Ռուսաստանի նախագահ Վլադիմիր Պուտինը հույս ունի, որ ԱՄՆ-ը կաջակցի ղարաբաղյան հակամարտության կարգավորման գործում։ Այս մասին նա ասել է Վալդայ ակումբի նիստի ժամանակ։

«Հերթական անգամ մեզ մոտ էին եկել երկու երկրների արտաքին գործերի նախարարները։ Ամսի 23-ին նրանք հանդիպում են Վաշինգտոնում։ Մեծ հույս ունեմ, որ մեր ամերիկացի գործընկերները մեզ հետ համահունչ կգործեն, կօգնեն կարգավորմանը։ Եկեք հուսանք ամենալավին», – ասել է Պուտինը։

ՌԴ նախագահը նշել է, որ հակամտրությունը սկսվել է էթնիկ դիմակայությունից։

«Այդ հակամարտությունը սկսվել է ոչ որպես սովորական միջպետական հակամարտություն եւ տարածքի համար պայքար։ Այն սկսվել է էթնիկ հակամարտությունից։ Ցավոք, դա փաստ է, երբ Սումգայիթում, ապա Լեռնային Ղարաբաղում հայ ժողովրդի դեմ դաժան հանցագործություններ են իրականացվել։ Մենք պետք է ամեն ինչ ամբողջական կերպով հաշվի առնենք։ Միևնույն ժամանակ, մենք հասկանում ենք, որ այնպիսի իրավիճակ է ստեղծվում, երբ չի կարող Ադրբեջանի տարածքի զգալի մասի կորուստը հավերժ մնալ այդպես։», – ասել է Պուտինը։

Ղարաբաղի հարցով Թուրքիայի հետ Ռուսաստանի դիրքորոշումը չի համընկնում ըստ ՌԴ նախագահի։

Ինչ վերաբերում է բանակցություններին, Պուտինն ասել է, որ եթե դրանք 30 տարվա ընթացքում արդյունք չեն տվել, չի նշանակում, որ պետք է սկսել կրակել։
Ոչ ոք ավելի շահագրգռված չէ ղարաբաղյան հակամարտության կարգավորմամբ, որքան Ռուսաստանը։ Խոսելով կարգավորման մասին՝ Պուտինը հույս է հայտնել, որ ԱՄՆ-ը կօգնի հակամարտության կարգավորման հարցում։

ՌԴ նախագահն ասել է նաև, որ շատ կցանկանար կոմպրոմիս գտնել ղարաբաղյան հարցում։ Նա նշել է, որ օրական մի քանի անգամ զրուցում է Հայաստանի վարչապետ Նիկոլ Փաշինյանի հետ։
Պուտինը նաեվ զգուշացում է արել Ռուսաստանի թշնամիներին, որոնք ցանկանում են տեսնել Ռուսաստանի թուլացումը։

«Ամրապնդելով մեր երկիրը, տեսնելով, թե ինչ է այսօր կատարվում աշխարհում, ցանկանում եմ դիմել նրանց, ովքեր սպասում են Ռուսաստանի թուլացմանը՝ մեզ մտահոգում է միայն մի բան՝ չմրսել ձեր թաղման ժամանակ»,- ասել է Պուտինը՝ խոսելով 3 տերությունների մասին, որոնք ստեղծել են հետպատերազմյան աշխարհակարգը:

Աղբյուր` Փաստինֆո