Փաստ ինֆո

Վերջին օրերին կորոնավիրուսային վարակի աննախադեպ աճ է գրանցվում։ Սա մեր բոլորի վարքագծի արդյունքն է։ Ամեն օր 500 դեպքով ավելի է գրանցվում նախորդ օրվանից։ Սրա հետևանքով առողջապահական համակարգը կարող է հայտնվել կոլապսի առջև և տեղ չունենանք մեր ծանր հիվանդներին հոսպիտալացնելու: Այս մասին ճեպազրույցի ժամանակ ասաց ԱՆ ՀՎԿԱԿ բժիշկ-համաճարակաբան Լուսինե Պարոնյանը:

Նա նշեց, որ այս պահին մոտ 10 անգամ ավելի դեպքեր ունենք, քան սեպտեմբերի սկզբին:

Համաճարակաբանի խոսքով՝ այսօր կորոնավիրուսով վարակված մոտ 2000 հիվանդ է բուժվում հիվանդանոցներում, բայց կան հիվանդներ, որոնք սպասում են հոսպիտալացվելու իրենց հերթին:

«Իհարկե, պատրեազմական իրավիճակում, երբ մեր բոլորի հայացքը դեպի ռազմաճակատ է ուղղված, կորոնավիրուսի նկատմամբ վերաբերմունքը երկրորդական պլան է մղվել: Սակայն մեր բժիշկներն այսօր անհրաժեշտ են մեր զինվորներին, ուստի պետք է ամեն ինչ անենք, որպեսզի  նվազեցնենք թվերը»:

Համաճարակաբանը կոչ արեց կրել դիմակ, ախտահանել ձեռքերը, պահպանել սոցիալական հեռավորություն, ինչպես այն ժամանակ, երբ դրանք պարտադիր էին, և հենց դրա շնորհիվ էր, որ նոր վարակակիրների թիվը նվազել էր։ Բժիշկը կրկնում է ամիսներ շարունակվող կոչը՝ դիմակը ճիշտ կրել և կանխել վարակի տարածումը։

Հայաստանում արձանագրվող յուրաքանչյուր դեպքի համար իրականացվում է հետազոտություն, վարակակիր անձանց հետ շփված անձինք գրանցվում են նախարարության համակարգում։

Իսկ արդյոք ռազմաճակատ մեկնելուց առաջ թեստավորում անցկացվու՞մ է, համաճարակաբանն ասաց, որ թեստավորումը նպատակահարմար չէ կազմակերպել, քանի որ հայտնի չէ՝ ո՞վ և ե՞րբ է մեկնում Արցախ: Արցախում բժիշկներն ու պաշտպանության նախարարությունը իրականացնում են հետազոտություններ և հսկողություն։ Կոնտակտավորների շրջանակի բացահայտմանն ուղղված աշխատանքները շարունակվում են:

Աղբյուր` Փաստինֆո