Փաստ ինֆո

«Մենք չենք եկել ԱՄՆ դեսպանատուն՝ ասելու, որ գան մեր տունը պաշտպանեն։ Մեր տները, մեր հողը պաշտպանում են մեր եղբայրները, մեր հայրերը, ամուսինները։ Մենք մեր հողը պաշտպանում ենք, դրա կարիքը չունենք, բայց մենք ասելիք ու պահանջ ունենք ԱՄՆ-ին, որովհետև որպես ԵԱՀԿ Մինսկի խմբի  անդամ պետություն  պատասխանատվություն է կրում այս ամենի համար»։ Այս մասին ՀՀ-ում ԱՄՆ դեսպանատան դիմաց բողոքի ակցիայի ընթացքում ասաց թուրք-ադրբեջանական և վարձկան ահաբեկիչների կողմից իրականացվող ագրեսիայի հետևանքով Արցախից տեղահանված կանանցից մեկը՝ Սիրանուշ Սարգսյանը։

Նա ընդգծեց, որ ԱՄՆ գործընկեր Թուրքիան պատերազմ է տանում մեր դեմ՝ Արցախի հողում և դա արվում է ԱՄՆ հանցավոր լռության պայմաններում։ Նրա խոսքով՝ որևէ մեկի համար գաղտնիք չէ և հենց ամերիկյան վերլուծական կայքերում են տեղեկություններ հայտնվում, որ ամերիկյան զինատեսակները, որոնք վաճառված են Թուրքիային, հայտնվում են մեր երկրի տարածքում։

«Ըստ ամերիկյան օրենսդրության՝ զենքի մասին օրենսդրության, որևէ ամերիկյան զինատեսակ իրավունք չունի առանց այդ երկրի թույլտվության հայտնվել մի ուրիշ երկրի տարածքում։ Իր գործընկերը, այսօր այդ զինատեսակներն օգտագործելով խաղաղ բնակչության դեմ, ավիրելով մեր տները, մեր քույրերին ու եղբայրներին սպանելով, հենց ամերիկյան օրենսդրությունն է խախտում և սա իրենք շատ լավ գիտեն, լուռ համաձայնում են այս ամենին»,- ասաց նա։

Նա ընդգծեց, որ ապրիլյան պատերազմից հետո կան ապացույցներ, որոնք ցույց են տալիս, որ տրամադրվող գումարները, որոնցով զինվորական կրթություն են ստանում ադրբեջանցի զինծառայողները, այդ նույն Ամերիկայում ամերիկյան գումարներով կրթություն ստացած զինվորականներն են կռվում Արցախի դեմ։ Բացի դա՝ ԱՄՆ-ն միակ երկիրն է, որ ՀՀ բացի, չճանաչելով ԱՀ-ն, անմիջական և ուղիղ ֆինանսավորում է անում Արցախին և այդ գումարները ծախսվում են ականազերծման համար և այժմ քննարկվում է այդ գումաները հանելու հարցը։

«Մեր լոբբիստական ընկերությունների բողոքի ալիքից հետո իրենք հայտարարում են, որ այդ գումարները կտան, բայց խաղաղասիրական ծրագրերի շրջանակներում։ Եկել են ինձ ու իմ սերնդակիցներին, որ երեք պատերազմ են տեսել ու, որ միայն խաղաղություն են ուզում, եկել են խաղաղասիրության ծրագիր են ուզում սովորեցնել։ Մենք կարող ենք աշխարհին խաղաղասիրություն սովորեցնել»,- ասաց նա։

Աղբյուր` Փաստինֆո