Փաստ ինֆո

Ադրբեջանի ցանկությունը Արցախին կապիտուլյացիայի ենթարկելն է, ինչի հետ չի կարող հայ ժողովուրդը համաձայնել։ Այսօր հայտարարել է ՀՀ վարչապետ Նիկոլ Փաշինյանը՝ կոչ անելով ՏԻՄ ղեկավարներին, քաղաքապետերին, գյուղապետերին կամավորագրվել, զենք վերցնել և նվիրվել հայրենիքի իրավունքի պաշտպանության գործին։

«Այս պրոցեսն արդյունավետ կազմակերպելու պարագայում է, որ մենք կարող ենք հասնել մեզ համար ընդունելի դիվանագիտական լուծման, որովհետև, ըստ էության Ադրբեջանն ասում է, որ որևէ այլ բանի, բացի Արցախի կապիտուլյացիայի, համաձայն չէ»,- ասաց Փաշինյանը։

Վերջինս ընդգծեց՝ առանց Արցախի չկա Հայաստան և պաշտպանել Արցախի ժողովրդի իրավունքը, նշանակում է պաշտպանել հայ ժողովրդի իրավունքը, ուստի՝ մնում է զենք վերցնել և պայքարել այնքան ժամանակ, մինչև հնարավոր կլինի դիվանագիտական եղանակով հասնել ընդունելի որևէ տարբերակի, ընդ որում, խոսքը գնում է հարցի վերջնական լուծման մասին։

Վարչապետը կոչ արեց բոլոր քաղաքապետերին, ՏԻՄ մարմինների ղեկավարներին՝ ստանձնել լիդերությունը, ձևավորել կամավորական ջոկատներ, որոնք կիրականացնեն հայ ժողովրդի իրավունքի պաշտպանության գործը, այդ ջոկատները պետք է գտնվեն ԳՇ պետի տրամադրության տակ և ձևավորման պահը պետք է համարժեք լինի զինվորական երդմանը։ Վերջինս նշեց, որ մենք ցեղասպանություն տեսած ժողովուրդ ենք, որն իրականում տեղի է ունեցել այն պատճառով, որ եղել է տրամադրություն, որ եղել են մարդիկ, որոնք կկանգնեն մեր ժողովրդի իրավունքների և անվտանգության պաշտպանության դիրքերում, բայց այդ մարդը երևի ես չեմ, երևի կան մարդիկ՝ ազատամարտիկներ և այլն, որոնք պետք է կանգնեն և այդ իրավունքը պաշտպանեն։Նրա խոսքով՝ այսօր էլ կան կերպարներ, ռազմի դաշտում լեգենդներ, որոնք անում են ամենը հայ ժողովրդի հաղթանակը կերտելու համար, սակայն պետք է նրանց կողքը կանգնել։ Փաշինյանը կոչ արեց նաև ՀԿ-ներին, քաղաքացիական նախաձեռնություններին, կուսակցություններին ձևավորել ինքնապաշտպանական ջոկատներ, որոնք պետք է գործեն ԳՇ պետի ենթակայության ներքո։

Աղբյուր` Փաստինֆո