Փաստ ինֆո

Արցախի Հանրապետության նախկին նախագահների հանդիպումները ՀՀ ներկա և նախկին բարձր պաշտոնյաների, քաղաքական ուժերի հետ թե՛ բնական է, թե՛ անխուսափելի,- այս մասին «Փաստինֆո»-ի հետ զրույցում ասաց ՀՅԴ ԳՄ անդամ Լիլիթ Գալստյանը:

Ինչպես արդեն տեղեկացրել ենք, այսօր հանդիպել են ՀՀ նախկին նախագահներ Լևոն Տեր-Պետրոսյանը, Ռոբերտ Քոչարյանը, Սերժ Սարգսյանը և Արցախի Հանրապետության նախկին նախագահներ Արկադի Ղուկասյանը և Բակո Սահակյանը, որի ժամանակ քննարկվել է Արցախում տիրող իրավիճակը: Նախօրեին տեղի էր ունեցել Արցախի երեք պաշտոնաթող նախագահների՝ Ռոբերտ Քոչարյանի, Արկադի Ղուկասյանի եւ Բակո Սահակյանի հանդիպումը, ապա նաեւ քառակողմ հանդիպումը՝ ՀՀ երրորդ նախագահ Սերժ Սարգսյանի մասնակցությամբ։ 

ՀՅԴ անդամ Լիլիթ Գալստյանը մեզ հետ զրույցում նշեց,որ հիմա ներքաղաքական օրակարգերի ժամանակը չէ, նաև կարևորեց ռազմական, քաղաքական և դիվանագիտական ճակատներում բեկում մտցնելը.

«Զարմանալի, անգամ դատապարտելի կլիներ անտարբերությունը:Արցախի ճակատագիրը հայ ժողովրդի ճակատագիրն է, այս ճշմարտությունն այնքան աներկբա է, անգամ բարձրաձայնելու կարիք չունի: Այսօր մեր համազգային ներուժի համախմբումն այլընտրանք չունի, ինչպես այլընտրանք չունի հաղթանակը: Մեր հաղթելու ճանապարհը անցնում է միայն ու միասնության, հավաքական ներուժի մոբիլիզացիայի ճանապարհով: Օրեր առաջ հենց այս տրամաբանությամբ էր ծնվել կուսակցությունների կոչը: Հիմա ներքաղաքական օրակարգերի ժամանակը չէ, հիմա երկիր- պետականություն-լինելիություն, հայրենիք արժեքներն են առաջնային: Շատ բնական են մեր հաստատումները՝ օրհասական այս իրավիճակում՝ ռազմական, քաղաքական և դիվանագիտական ճակատներում բեկում մտցնելը հրամայական է: Ստեղծված կացությունը համազգային ներուժի ամբողջական և աննախադեպ զորաշարժ է պահանջում»,-նշեց զրուցակիցը:

Մեր այն հարցին՝ թե նախագահների հանդիպումը կարո՞ղ է դիտարկվել՝ որպես կուսակցությունների առաջարկած ռազմաքաղաքական հարցերի օպերատիվ շտաբի ձևավորման դրսևորում, զրուցակիցը պատասխանեց, որ սա օպերատիվ շտաբի ձևավորելու դրսևորում-նախագիծ չէ, այլ պարզապես իրավիճակի գնահատումով պայմանավորված, քաղաքական պատասխանատվություն ունեցող պետական գործիչների վարքագիծ՝ ամեն ինչ անել, ուժերի գերլարումով և միասնությամբ գտնել լուծումներ, դիմագրավել մեր գոյաբանական սպառնալիքը:

«Ցավում եմ, որ որոշ իռացիոնալ շրջանակներ, կամ ավելի ճիշտ այլ օրակարգերի լծված վարձկաններ, մեր առաջարկ-կոչը փորձեցին պիտակավորել»,- ասաց Լիլիթ Գալստյանը:

Աղբյուր` Փաստինֆո