Փաստ ինֆո

Արցախցի երեխաները Երևանում իրենց լավ են զգում, այստեղ օրը խաղերով են անցկացնում, դասերի մասին չեն մոռանում։ Աշխատանքի և սոցիալական հարցերի նախարարության ժամանակավոր կայանման կետում՝ Հայորդաց տանը մեկ օր մնացել են ու տեղափոխվում են ավելի երկարաժամկետ կացարանում ապրելու։

Տիկին Սվետլանան Հադրութի շրջանից է։ Տղան սահմանին է՝ դստեր ընտանիքում շուտով երեխա է ծնվելու։ Հույս ունի շատ շուտով ընտանիքը կրկին կվերամիավորվի։

«Որ կռիվը դադարի՝ լավ կլինի։ Զինվորս զանգահարեց՝ ասաց լավ է, ասաց մամ ջան իրար հետ եղեք»։

Արցախի քաղաքացիները պատերազմը սկսվելուց հետո ստիպված են եղել լքել իրենց բնակավայրերը։ Շատերն անգամ առանց հագուստի են հասել Երևան։ Այստեղ նրանց համար ժամանակավոր կացարան է գործում։ Տատիկը, որ անունը չցանկացավ նշել, ասաց, որ կարոտել է իր Արցախի համն ու հոտը, 30 տարվա երջանիկ կյանքը։

«Ուզում եմ հաղթանակած տուն վերադառնան։ Կարոտել եմ հայրենի հողը, 30 տարվա կյանքը, մեր օդը, երեխաների ժպիտով խաղը։ Հաղթանակ եմ ուզում, հուսով ենք հետ կվերադառնանք»,- «Փաստինֆո»-ի հետ զրույցում ասել է արցախցին։

Մյուս հերոս արցախցի կինը թոռների հետ ժամանակավոր կայանման կետ այսօր էր եկել։ Առաջին կրակոցները լսելիս ամուսնու հետ այգում կարմիր պղպեղ էին հավաքում։ Տանից դուրս գալուց վերցրել է մի քանի շոր, անձնագրեր և ճնշման չափիչ սարքը։ Երկու որդիները սահմանին պաշտպանում են հայրենիքը։ Մեկը բեկորային վիրավորում է ստացել՝ տեղափոխվել է Երևան։

Քանաքեռ-Զեյթուն վարչական շրջանի «Հայորդաց տան» շենքում կայանման կետը գործում է Արցախից Հայաստան տեղափոխված քաղաքացիների համար, ովքեր Հայաստանում չունեն ժամանակավոր բնակության վայր, այստեղ իրականացվում է հրատապ կացության, սննդի, հագուստի հարցը։ Սոցաշխատակից Սոնա Առաքելյանը պատմեց՝ կացության համար դիմում են հիմնականում կանայք և երեխաներ։ Այստեղ նրանց հոգեբանական աջակցություն է տրամադրվում։

Մշտական բնակության վայր չունեցողները կամ հյուրընկալողները կարող են այցելել Քանաքեռ-Զեյթուն վարչական շրջան, Ներսիսյան 14/1 հասցեում գտնվող «Հայորդաց տան» շենք։ Կայանման կետը շուրջօրյա է։

Աղբյուր` Փաստինֆո