Փաստ ինֆո

«Միջազգային հանրության կողմից տարբեր տիպի արձագանքներ կան, և այստեղ շատ էական է դիրքորոշումների հստակությունը: Իհարկե, շատ տեղեր կան, որտեղ մենք բավարարված չենք»,- լրագրողների հետ զրույցում ասաց ՀՀ փոխարտգործնախարար Շավարշ Քոչարյանը՝ անդրադառնալով հարցին՝ արդյոք մեզ բավարա՞ր են միջազգային հանրության արձագանքները։ 

Քոչարյանը ավելեց, որ ամեն ինչ որոշվում է մարտի դաշտում, պետք չէ սպասել, որ նա, ով հույս ունի, որ օտարը կգա իրեն օգնելու, դատապարտված է: Ըստ նրա՝ Թուրքիայի բացահայտ երևալը խոսում է հնարավոր ցեղասպանության մասին, դրա համար էլ մենք պետք է այս մարտը հաղթենք:

«Խոսքը վերաբերում է ոչ միայն պատերազմում պարտություն կրել-չկրելուն, այլ՝ հնարավոր ցեղասպանությանը։ Պետք է չնայենք աջ-ձախ, այլ պետք է շատ վճռական մեր մարտը հաղթենք, որից հետո կտեսնենք ինչ հարգանքով մեզ կվերաբերվեն բոլոր միջազգային կազմակերպությունները»,- ասաց Քոչարյանը։

Իսկ ինչո՞ւ Հայաստանը չի դիմում ՀԱՊԿ-ին՝ հարցին ի պատասխան Քոչարյանը նշեց, որ պետք է ագրեսիա լինի Հայաստանի նկատմամբ, որ ՀԱՊԿ-ին դիմելու անհրաժեշտություն առաջանա:

«Կրակոցները գնահատել որպես ագրեսիա Հայաստանի նկատմամբ դեռ վաղ է: Եթե հարձակում լինի, նախ՝ մենք ինքներս պետք է դիմենք ՄԱԿ-ին, որով մենք ֆիքսում ենք, որ մեր դեմ ագրեսիա է, և մենք ինքնապաշտպանության ենք դիմում, դիմում ենք նաև ՀԱՊԿ-ին, որին արդեն պետք է կոլեկտիվ ինքնապաշտպանության մասին տեղեկացնի ՄԱԿ-ը: Եթե դու ունես փամփուշտ, որը կարող է կրակել, այդ փամփուշտը պետք է օգտագործել այն ժամանակ, երբ այն դատարկ չէ»,- նշեց Քոչարյանը:

Աղբյուր` Փաստինֆո