Փաստ ինֆո

«Երեկ դիմել ենք Եվրոպական դատարան՝ կիրառված միջանկյալ միջոցի շրջանակներն ընդլայնելու խնդրանքով: Դատարանի կողմից առաջիկա օրերին պատասխան ենք ակնկալում: Հուսանք, որ այն կլինի դրական: Իհարկե, սա բարդ պրոցես է, պատերազմական գործողություններ են ընթանում, սակայն կարծում եմ՝ հիմա և հետո էլ այդ քայլերը շատ կարևոր են լինելու», - այս մասին հայտնեց Մարդու իրավունքների եվրոպական դատարանում Հայաստանի Հանրապետության ներկայացուցիչ Եղիշե Կիրակոսյանը:

Կիրակոսյանը նշեց, որ հաշվի են առնել վերջին շաբաթվա ընթացքում հրապարակված տարբեր տեսանյութերի առկայությունը, որոնցով հստակ երևում են ադրբեջանցի զինվորականների կողմից հայ ռազմագերիների կամայական գնդակահարությունների, դիակների անարգման, գլխատումների դրվագներ։ Կիրակոսյանն ասաց, որ ակնկալում են առաջիկա օրերին դրական պատասխան դատարանի կողմից։

Հիշեցնենք, որ Եվրոպական դատսրնում ՀՀ ներկայացուցչի գրասենյակի կողմից մի շարք քայլեր են ձեռնարկվել։ Երբ որ պատերազմական գործողությունները սկսվեցին, սեպտեմբերի 27-ին ներկայացվեց պահանջ՝ Ադրբեջանի դեմ միջանկյալ միջոց կիրառելու մասին, որից հետո ստացվեց ամսի 29-ի որոշումը եվրոպական դատարանի կողմից։

Հաջորդ քայլը, հիմք ընդունելով Թուրքիայի ներգրավվածության մասին թե հրապարակային, թե  միջազգային մամուլի, և թե նաև տարբեր պետությունների ղեկավարների կողմից հնչեցրած կոչերն ու ուղերձները, ներկայացվել էր խնդրանք՝ Թուրքիայի նկատմամբ կիրառել միջանկյալ միջոց, որպեսզի կանխվի վերջինիս ուղղակի և անուղղակի միջամտությունը։ Հայկական պատվիրակությունը ներկայացրել էր փաստարկներ և ապացույցներ, որը հաստատվեց հոկտեմբերին 6-ին, որի հիման վրա էլ հետագայում ընթացան որոշակի պրոցեսներ։ Թուրքիայի կողմից միջոցներ ձեռնարկվեցին, որպեսզի դատարանը վերացնի կիրառված միջանկյալ միջոցը։ Այդ  նպատակով հատուկ նամակ ուղարկվեց Չավուշօղլուի կողմից, որը դատարանը մերժեց։

«Դա վկայում է այն մասին, որ ապացույցներն այնքան համոզիչ էին, կարծում եմ միջազգային հանրության շրջանում  էլ այլ կարծիք չկա, որ ավելի է զորեղ է դառնում այդ կարծիքը»,- ասաց Կիրակոսյանը։

Աղբյուր` Փաստինֆո