Փաստ ինֆո

Այս պահի դրությամբ առնվազն 36 քաղաքացիական զոհ ունենք եւ 115 վիրավոր։ Այս մասին ճեպազրույցի ընթացքում ասել է ԱՀ ՄԻՊ Արտակ Բեգլարյանը։

Նրա փոխանցմամբ՝ 36 քաղաքացիական զոհերից 20-ը սպանվել են իրենց բնակության վայրում, ինչը նշանակում է, որ անակնկալ եւ թիրախային հարձակման հետեւանքով են եղել այս դեպքերը, քանի որ բնակության վայրն ինքնին ենթադրում է, որ դա քաղաքացիական օբյեկտ է, իսկ հակառակորդը կիրառում է գերճշգրիտ հրթիռներ և ԱԹՍ֊ներ, որոնց շնորհիվ հնարավոր է կանխատեսել, թե ինչ թիրախի է հարվածում և սխալի հավանականությունը գործնականում շատ ցածր է։

Բեգլարյանը նշեց, որ 36 քաղաքացիական զոհերից ութը կին է, մոտ կեսը՝ հիսունից բարձր տարիքի, ինչը նշանակում է, որ պատկանում են տարիքային խոցելի խմբերին։ Նրա փոխանցմամբ՝ քաղաքացիական վիրավորների մոտ կեսը վիրավորվել է իր բնակության վայրերում, մյուս մասը՝ աշխատանքի վայրում կամ անվտանգ տեղ տեղափոխվելիս։

Ինչ վերաբերում է վիրավորում ստացած քաղաքացիական անձանց, Բեգլարյանը հայտնեց, որ 115 վիրավորից 95 լուրջ վիրավորումներ են ստացել, մոտ 20֊ը՝ թեթև վիրավորումներ։ Անդրադառնալով նյութական վնասներին՝ Բեգլարյանը հայտնեց, որ սեպտեմբերի 27֊ից սկսած լայնածավալ թիրախավորում է տեղի  ունեցել ավելի քան 130 բնակավայրի ուղղությամբ, որոնք գտնվում են տարբեր աշխարհագրության վրա՝ հարավից հյուսիս և սահմանամերձ գյուղերից ու բնակավայրերից մինչև ամենախորքային բնակավայրերը։

Նախնականհաշվարկներով՝ Ադրբեջանի հասցրած հարվածներից վնասվել է 7800 անշարժ գույք՝ բնակարան, տուն, խանութ եւ այլն, 1310-ից ավելի ենթակառուցվածք՝ հանրային կամ արտադրական նշանակության օբյեկտներ, 720-ից ավելի մեքենա։

Նրա խոսքով՝ 1310-ից ավելի ենթակառուցվածքի մեջ մտնում են էլեկտրամատակարարման համակարգերը, կայանները, ցանցերը, նույնը՝ կապի եւ հաղորդակցության, ջրամատակարարման, գազամատակարարման ոլորտում, ինչպես նաեւ տրանսպորտային, ճանապարհատրանսպորտային ոլորտում՝ ներառյալ կամուրջները։

Աղբյուր` Փաստինֆո