Փաստ ինֆո

Միջազգային կառույցները լուռ են մեր ցավի նկատմամբ։ Այս մասին լրագրողների հետ զրույցում ասաց ՄԱԿ-ի հայաստանյան ներկայացուցչության դիմաց բողոքի ակցիայի նախաձեռնության ներկայացուցիչը։ 

Հիշեցնենք, որ ՄԱԿ-ի Երևանյան գրասենյակի դիմաց բողոքի ցույց է իրականացվում՝ պահանջելով բացել աչքերը ու կոնկրետ քայլեր ձեռնարկել Ադրբեջանաթուրքական տանդեմի ռազմական ագրեսիան դադարեցնելու ուղղությամբ։ «Մենք խաղաղություն ենք ուզում» վանկարկում էին ակցիայի մասնակիցները։

Ակտիվիստները հանդիպում էին պահանջում ՄԱԿ-ի հայստանյան ներկայացուցչի հետ՝ պարզաբանում ստանալու, սակայն ներկայացուցիչը հանդիպման չեկավ, փոխարենը մի աշխատակից զրուցեց ակցիայի մասնակիցների ներկայացուցչի հետ՝ ասելով, թե շատ լավ տեղյակ են խնդրին։

«Ասաց, որ տեղյակ են խնդրից և որևէ կոչ, որևէ հայտարարություն ՄԱԿ-ի ասամբլեայում չի բարձրաձայնվել։ Որևէ պատժամիջոց, որևէ զսպաշապիկ Ադրբեջանի նկատմամբ չի կիրառվել»,- պատմեց ակցիայի կազմակերպիչներից մեկը՝ ներկայացնելով քննարկումը։

Նրա խոսքով՝ պետք է փաստել, որ միջազգային հանրությունը հերթական անգամ տեսնի և գրանցի, որ ՄԱԿ-ը դատարկ խաղաղության կոչեր է հնչեցնում և դրանցից ոչ մեկն իրականության հետ աղերս չունի։ Նրա խոսքով՝ տարբերակված մոտեցումը տեսանելի է այնքան, որ Ադրբեջանում 10 քաղաքացիական զոհի համար ՄԱԿ-ի ադրբեջանական ներկայացուցիչը հայտարարում է՝ խաղաղ բնակչությունն է զոհվում, հասեք ՄԱԿ, մինչդեռ՝ այսօր Արցախում և Գեղարքունիքի մարզում ունենք 31 քաղաքացիական զոհ, ունենք 100-ից ավելի քաղաքացիական վիրավոր և նույն ՄԱԿ-ի հայաստանյան ներկայացուցչությունը որևէ արձագանք չի տալիս։ «Ավելին՝ մի թեթև սվաղած տեքստ է հրապարակում թվիթերյան էջում ՝հանրային մեծ աղմուկից հետո։ Սրանից այն կողմ կողմնակալ վերաբերմունքն ինչպե՞ս է լինում։ Այ այս զինվորի ընտանիքի վիշտը, հայ ազգի վիշտը ծանրանալու է միջազգային բոլոր կառույցների ուսերին։ Խնդրում եմ՝ այս նկարը 1000 անգամ մեծացնել և ցույց տալ միջազգային լռությունը՝ այս նկարի նկատմամբ, այս զինվորի նկատմամբ, այս զինվորի մոր ցավի նկատմամբ, ազգի նկատմամբ»,- ասաց նա։

Աղբյուր` Փաստինֆո