Փաստ ինֆո

Ադրբեջանին զենք մատակարարելու մասին շրջանառվող տեղեկատվության վերաբերյալ Հայաստանում Բելառուսի դեսպանատունը հանդես է եկել հայտարարությամբ, որի մասին ես իմ մտահոգությունն էի հայտնել Հայաստանում Բելառուսի գործերի ժամանակավոր հավատարմատարի և խորհրդականի հետ հանդիպման ընթացքում։ Այս մասին տեղեկացնում է ՀՀ ԱԺ փոխնախագահ Վահե Էնֆիաջյան` հրապարակելով դեսպանատան մամուլի հաղորդագրությունը:

Իսկ դեսպանատան հաղորդագրության մեջ, մասնավորապես, ասվում է.

Հաշվի առնելով հոկտեմբերի 12-ին Հայաստանի Հանրապետությունում Բելառուսի Հանրապետության գործերի ժամանակավոր հավատարմատար Սերգեյ Տրոցյուկի հանդիպումը ՀՀ ԱԺ փոխնախագահ, Հայաստանի Հանրապետության Ազգային ժողովի եւ Բելառուսի Հանրապետության Ազգային ժողովի միջեւ համագործակցության միջխորհրդարանական հանձնաժողովի նախագահ Վահե Էնֆիաջյանի հետ' անհրաժեշտ ենք համարում անել հետեւյալ հայտարարությունը

Ինչպես հայտնի է, հոկտեմբերի 4 – ին Հայաստանի նախագահ Արմեն Սարգսյանի հետ կայացած հեռախոսազրույցի ընթացքում Բելառուսի Հանրապետության Նախագահ Ալեքսանդր Լուկաշենկոն հստակ և միանշանակ պատասխան է տվել հայ գործընկերոջ հարցին՝ վերջին կես տարում ռազմարդյունաբերական համալիրի գծով ոչ մի ռազմական բեռ չի մատակարարվել ոչ Ադրբեջանին, ոչ Հայաստանին։

Սա առավել ճշգրիտ եւ հավաստի տեղեկատվությունն է: Ոչ մի իմաստ չկա դրան վերադառնալ։

Բելառուսում անկեղծորեն անհանգստանում են Լեռնային Ղարաբաղի հակամարտության գոտում ռազմական գործողությունների կապակցությամբ։ Ներկա իրավիճակում շատ կարևոր է դադարեցնել արյունահեղությունը և խուսափել նոր զոհերից։

Այդ պատճառով կուզենայինք ևս մեկ անգամ ուշադրություն հրավիրել Բելառուսի Հանրապետության ԱԳՆ սեպտեմբերի 28-ի հայտարարության վրա, որում մենք ոչ միայն կոչ ենք արել, այլև խնդրել ենք Ադրբեջանին և Հայաստանին դադարեցնել մարտական գործողությունները, հրաժարվել զենքի կիրառումից և գտնել իրավիճակի խաղաղ կարգավորման ուղիներ, այդ թվում՝ ԵԱՀԿ Մինսկի խմբի շրջանակներում:

Բելառուսը պատրաստ է ցանկացած անհրաժեշտ աջակցություն ցուցաբերել կողմերի երկխոսությունն այս եւ նրանց համար ընդունելի այլ ձեւաչափերում առաջ մղելու հարցում:

Բացի այդ, նպատակահարմար ենք գտնում Հայաստանի զանգվածային լրատվամիջոցների ուշադրությունը հրավիրել բացառապես ստուգված տեղեկատվության օգտագործման անհրաժեշտության վրա, առաջին հերթին այնպիսի զգայուն հարցերում, ինչպիսիք են ռազմատեխնիկական համագործակցությունը:

Աղբյուր` Փաստինֆո