Փաստ ինֆո

«Ես իրոք սկսել եմ վա՞տ հասկանալ։ ՀԱՊԿ-ն ի՞նչ է։ Հայաստանը մեր դաշնակիցն է՝մեր պաշտպանության տա՞կ է, թե՞ ոչ։ Ադրբեջանի զինված ուժերն ընդունում են, որ հարված են հասցրել Հայաստանի տարածքին։ Ընդ որում, նրանք այն անվանում են կանխարգելիչ... Այսինքն, նրանք կարծում են, որ կարող են խոցել մեր դաշնակցի տարածքում գտնվող թիրախները»,- նման մտահոգություն է հայտնել հաղորդավար Վլադիմիր Սոլովյովն իր «Полный контакт» հաղորդման շրջանակներում:

Հիշեցնենք, ադրբեջանական կողմը՝ թիրախավորելով Հայաստանում տեղակայված ռազմական տեխնիկան, հայտարարել էր, թե հարվածը եղել է «կանխարգելիչ»։ Ադրբեջանական ագրեսիայի հետևանքով զոհվել է 2 զինծառայող, վիրավորվել 10-ը։ Տուժածներ կան նաեւ խաղաղ բնակչության շրջանում, այդ թվում՝ երեխաների։

Սոլովյովը հիշեցրել է նաև Սիրիայից Ադրբեջան բերված վարձկանների մասին, որոնց Ռուսաստանը ժամանակին Սիրիայում ոչնչացրել է, իսկ այժմ նույն գրոհայինները հայտնվել են ռուսական սահմանից 80 կմ հեռավորության վրա։

«Սա ուղիղ մարտահրավեր և ապտակ է Ռուսաստանին, և պետք է հասկանալ՝ արդյոք այդ սադրանքին հավանություն Է տվել անձամբ Ադրբեջանի նախագահ Ալիևը, թե ոչ»,- զայրացած ասել է հաղորդավարը։

«Մեր դաշնակցի տարածքին հարվածելն ի՞նչ է նշանակում։ Դա ստացվում է պատերազմ Ադրբեջանի և Հայաստանի միջև՞։ Այսինքն, բոլոր դիմակները պատռվա՞ծ են։ ՀԱՊԿ անդամ երկրի տարածքին են հարվածում, որի նկատմամբ մենք ունենք պարտավորություններ եւ սա չնայած ԱԳ նախարարի հետ բանակցություններին, պաշտպանության նախարարի հետ հանդիպումներին։ Ո՞րը պետք է լինի մեր ադեկվատ պատասխանը։

Մնում է միայն հասկանալ` Ադրբեջանի նախագահը պատրաստվո՞ւմ է արդյոք ներողություն խնդրել»,- ասել է Սոլովյովը։
Վերջինս վստահ է, որ Ռուսաստանը պետք է վճռական պատասխան տա՝ ոչ թե դեսպանին հետ կանչի, այլ իրական պատասխան տա։ Հակառակ դեպքում ոչ ոք դրանից հետո չի ցանկանա մտնել Ռուսաստանի հովանու տակ։

«Հետխորհրդային տարածքում ի՞նչ ռուսական ազդեցության մասին կարող է խոսք լինել, եթե մենք թույլ ենք տալիս ահաբեկչական դե-ֆակտո անկլավի գոյությունը, որը դեռևս չի ձևավորված, բայց մեր սահմանից 80 կմ հեռավորության վրա հավաքագրել է արգելված կազմակերպությունների գրոհայիններին», - կարծում է նա:

Աղբյուր` Փաստինֆո