Փաստ ինֆո

Թուրքական F-16 տեսակի բազմաֆունկցիոնալ ինքնաթիռներն Ադրբեջանի Հանրապետության տարածքում հայտնվել են դեռևս հուլիս ամսին՝ թուրք-ադրբեջանական լայնամասշտաբ ռազմավարական զորավարժությունների նախապատրաստման նախօրեին։ Այս մասին ասուլիսի ընթացքում ասել է ՀՕՊ զորքերի հրամանատարի տեղակալ Գարիկ Մովսեսյանը։

«Ինչպես զորավարժությունների նախապատրաստման, այնպես էլ՝ զորավարժությունների անցկացման ընթացքում նշված ինքնաթիռներն ակտիվ գործողություններ են իրականացրել, ակտիվ ուսումնամարտական թռիչքներ իրականացրել ՀՀ և ԱՀ պետական սահմանի ամբողջ երկայնքով՝ հիմնականում թիրախավորելով Գյանջա-Վարդենիս, Գյանջա- Քարվաճառ, Գյանջա-Մարտակերտ, Ստեփանակերտ և Հադրութ ուղղությունները»,- ասաց Մովսեսյանը՝ նշելով, որ զորավարժությունների ավարտից հետո նշված ինքնաթիռները Թուրքիայի Հանրապետության տարածք չեն վերադարձել, մնացել են տեղակայված Գյանջայի օդանավակայանում։ Հետագայում՝ սեպտեմբերի 23-ին ԹՀ ռազմաօդային ուժերի հրամանատարությունն իրականացրել է Գյանջա օդանավակայանում տեղակայված F-16 ինքնաթիռների, նրանց անձնակազմերի և տեխնիկական կազմի հերթափոխ, ընդ որում՝ վերաթռիչք ՝ Թուրքիայի տարածքից Ադրբեջան իրականացվել է Վրաստանի օդային տարածքով։

Նրա փոխանցմամբ՝ սեպտեմբերի 23-ին հերթափոխ կատարած ինքնաթիռները Գյանջայից թռիչք են իրականացրել Վրաստանի տարածքով և վերատեղակայվել իրենց հիմնական բազավորման օդանավակայան։

Մովսեսյանն ընդգծեց, որ Ադրբեջանի կողմից սեպտեմբերի 27-ին սանձազերծած լայնամասշտաբ հարձակողական գործողություններ են իրականացվում, որքան էլ ադրբեջանական կողմը հայտարարի, թե եղել են հակահարձակողական գործողություններ։

Մովսեսյանն ընդգծեց, որ առաջին իսկ օրվանից F-16 ինքնաթիռներն ակտիվորեն ներգրավված են եղել օդի խնդիրների կատարմանը, այն է՝ ՀՀ և ԱՀ տարածքների և օբյեկտների ռմբակոծումը և հրթիռակոծումը, մասնավորապես, կան մի շարք փաստեր, որոնք ապացուցում են նրանց՝ մարտական գործողությունների ներգրավվածությունը։

Աղբյուր` Փաստինֆո