Փաստ ինֆո

Արցախա-ադրբեջանական շփման գծի ողջ երկայնքով թշմանու կողմից սանձազերծված աննախադեպ ռազմական ագրեսիայի արդյունքում  Արցախի Մարտակերտի շրջանի Մոխրաթաղ գյուղից մի մեծ ընտանիք՝ կանայք,  26 մեծ ու մանուկ երեխաների հետ այս օրերին պատսպարվել են Հայաստանում՝ Մուսալեռ համայնքի մանկապարտեզում։ Խմբում ամենատարեց կինը պատմում է՝ Մարտակերտում   խաղաղ բնակչության հրթիռակոծումը շատ անսպասելի է սկսվել՝ առավոտ էր, գյուղում մարդիկ իրենց գործերով էին զբաղված։

Երեք  երեխաների մայրը, որը նույնպես ընտանիքի կանանց և երեխաների հետ ժամանակավոր կացարան է գտնել համայնքի մանկապարտեզում, պատմում է՝ տղամարդիկ բոլորով մնացել են Մարտակերտում՝ սահմանն են պահում։ Իրենք էլ Հայաստան են տեղափոխվել մեծ դժվարությամբ. «Մեզ, կարելի է ասել, փրկեցին և եթե չլիներ ընտանիքիս՝ երեխաներիս փրկության հարցը, դուրս չէի գա գյուղից։ Այստեղ շնորհակալ ենք բոլորից։ Հետներս գրեթե ոչինչ չենք հասցրել վերցրել, այստեղ՝ Հայաստանում և՛ ապաստարան են տվել, և՛ անհրաժեշտ իրեր, և՛ սնունդ», -պատմում է արցախցի կինը։

Տարբեր տարիքի 26 երեխա արդեն ավելի քան 15 օր է ապրում են  Մուսա Լեռ համայնքի մանկապարտեզում։ Տղաներից մեկը պատմում է՝ մինչև պատերազմի սկսելը իրենց գյուղի դպրոցն էր հաճախում, մեկ ամիս է հացրել դպրոց գնալ։ Տեղյակ չէ, թե որտեղ են դասընկերները, լսել է՝ ոմանք ընտանիքներով Երևանում են օթևան գտել։ Ասում է՝ անօթաչուներով ռմբակոծում էին  իրենց գյուղը։ Մթության մեջ դրանց արձակած լույսերն ու պայթյունների ձայներեն է լսել միայն։

Պատասխանելով հարցին՝ ի՞նչ են սպասում Հայաստանում ապաստանած  արցախցի կանայք, նրանցից ամենատարեցը պատասխանում է.«Չեմ պատկերացնում, որ Արցախը կարող է  մերը չլինի։ Մենք մեր հողն ենք ուզում, մեր տունը։ Այստեղ մեզ լավ ենք զգում, մեզ լավ են նայում, բայց ժամ առաջ մեր տուն վերադառնալու մասին ենք մտածում»։

 Մանրամասները՝ տեսանյութում

Հեղինակ՝ Նվարդ Մանվելյան

Աղբյուր` Փաստինֆո