Փաստ ինֆո

ՀՀ իշխանությունների կողմից հողերը հանձնելու վերաբերյալ լուրեր տարածելու մեջ մեղադրվող ՊԲ ծառայող Ն. Մ.-ն կալանավորվել է։ ԱԱԾ լրատվական ծառայությունից «Փաստինֆո»-ի հարցին ի պատասխան հայտնեցին, որ Ն. Մ.-ին մեղադրանք է առաջադրվել ՀՀ քրեական օրենսգրքի 364-րդ հոդվածի 3-րդ մասի հատկանիշներով, այն է՝ զինվորական ծառայությունից կամ դրա առանձին պարտականությունները կատարելուց զինծառայողի հրաժարվելը, որը կատարվել է ռազմական դրության, պատերազմի կամ մարտի ժամանակ։ Ն.Մ.-ի նկատմամբ որպես խափանման միջոց է ընտրվել կալանավորումը։

Հիշեցնենք, որ հոկտեմբերի 8-ին ԱԱԾ-ն հաղորդագրություն է տարածել այն մասին, որ Ն.Մ.-ն ռազմական դրության պայմաններում, նշանակված լինելով ՊԲ N զորամասի գումարտակում որպես կապի դասակի հրամանատարի տեղակալ և ծառայություն իրականացնելով զորամասի պահպանությանը հանձնված N մարտական դիրքում, նույն դիրքի ավագի հետ մարտական հերթապահություն իրականացնող համածառայակիցների շրջանում կեղծ և ստահոդ լուրեր է տարածել ՀՀ իշխանությունների կողմից իբրև հողերը հանձնելու վերաբերյալ ձեռք բերված պայմանավորվածության մասին՝ կարծիք հայտնելով, որ նման պայմաններում իրենք անիմաստ են կռվում և իրենց առջև դրված մարտական խնդիրը կատարելն իմաստազուրկ է։

«Հիշատակված գործողությունների արդյունքում էականորեն խաթարվել է իրենց մարտական խնդիրները կատարող զինծառայողների բարոյահոգեբանական վիճակը, վերջիններիս մոտ առաջացել է վախի, տագնապի և անպաշտպանվածության զգացողություն, որի արդյունքում մարտական ծառայություն իրականացնող զինծառայողներից ոմանք, տրվելով սադրանքներին, լքել են ծառայության վայրը՝ հրաժարվելով կատարել իրենց զինվորական պարտականությունները»,- նշված է հաղորդագրությունում։

Աղբյուր` Փաստինֆո