Փաստ ինֆո

Բավականին լուրջ գործընթացներ են ընթանում՝ քաղաքական և դիվանագիտական դաշտում։ Այս պատերազմը ռազմաքաղաքական մարտահրավեր է։ Այս մասին ասուլիսին ասել է Դավիթ Բաբայանը։

«Քաղաքական առումով՝ հոկտեմբերի 10-ին ձեռք է բերվել պայմանավորվածություն, որ դադարեցվի պատերազմը։ Փաստորեն՝ քաղաքական առումով պայմանավորվածությունը կա, մնում է՝ ռազմական։ Տեսնում ենք, որ հակառակորդը շարունակում է իր ագրեսիվ քաղաքականությունը և մտադիր չէ որևէ ձևով դադարեցնել իր գործողությունները»,- նշեց Բաբայանը՝ հավելելով, որ դա տեսնում են նաև այլ երկրներում, մասնավորապես՝ ՌԴ-ում, որտեղ մեծ ջանքեր են գործադրում պատերազմի դադարեցման ուղղությամբ։

Նրա խոսքով՝ սկզբնական շրջանում եղել են կոչեր, այնուհետև՝ Մոսկվայում տեղի ունեցավ ՀՀ և Ադրբեջանի ԱԳ նախարարների հանդիպումը, որը տևեց ավելի քան 10 ժամ, ուստի՝ 10 ժամ տևած բանակցությունների արդյունքում չի կարող զինադադար հաստատվել 2 օրով կամ 2 ժամով, դա պետք է լինի անժամկետ, ինչպես և եղավ՝ փաստաթղթով, սակայն Ադրբեջանը, Թուրքիան և ահաբեկիչները շարունակում են իրենց գործողությունները և ականատես եղանք տրանսֆորմացիայի։

«Սկզբում՝ Կրեմլին մոտ հասարակական գործիչներ սկսեցին խոսել, ասացին՝ եթե չեք ուզում լսել Լավրովին, կլսեք՝ Շոյգուին։ Այդպես տեղի ունեցավ։ Ինքը՝ ԱԳ նախարար Լավրովը հաջորդ օրը հայտարարեց, որ արդեն ՊՆ-ն է զբաղվում հակամարտության կարգավորմամբ՝ որպես միջնորդ։ Այնուհետև՝ Շոյգուն պաշտոնապես հայտարարեց, որ աշխատում է, որ անմիջապես դադարեցվեն ռազմական գործողությունները»,- ասաց նա՝ նշելով, որ տեսանք նաև այլ քայլեր, մասնավորապես, խոցվեցին բավականին ստվար զանգվածներ՝ Սիրիայում տեղակայված գրոհայինների ճամբարները, որոնք պետք է գային Արցախ։ Բացի դա՝ Չեչնիայում տեղի ունեցող գործընթացները, որը ևս պատգամ է։

Ըստ Բաբայանի՝ գործընթացը կարող է մտնել այլ փուլ և, եթե այս ամենից հետո նույնպես որևէ բան չլինի, չի բացառվում, որ կոչով կարող է դիմել նաև ՌԴ նախագահը։

«Եթե Թուրքիան և Ադրբեջանը որևէ ձևով չարձագանքեն նման կոչի, չի բացառվում, որ անցնեն ավելի ակտիվ և ավելի կոշտ քայլերի։ Դրա համար կան բոլոր քաղաքական նախադրյալները և նախապատրաստական աշխատանքներն իրականացվել են։ Եթե ահաբեկիչներն անցնում են Ռուսաստանի տարածք, սա արդեն շատ լուրջ է»,- ասաց նա՝ հավելելով, որ մտածել, որ Ռուսաստանը ձեռքերը ծալած նստելու է, այդպես չէ։

Բաբայանը գտնում է, որ պետք է այլ զարգացումներ ևս նկատել, այսինքն, այն, որ Թուրքիան մտել է տարածաշրջան և չի պատրաստվում կամավոր դուրս գալ, փաստ է։ Բացի դա՝ վերջիններս նաև նախաձեռնել են համաթուրքական բանակ ստեղծելու գաղափարը, սակայն Բաբայանը վստահ է, որ Կենտրոնական Ասիայի երկրները չեն մասնակցելու ավանտյուրային։

Աղբյուր` Փաստինֆո