Փաստ ինֆո

Ակնհայտ է, որ եղել է որոշակի պայմանավորվածություն, որի շուրջ կողմերն աշխատել են և ինչ-որ պահից սկսած Ադրբեջանը որոշել է բանակցությունների սեղանին ընթացող պրոցեսին տեմպ հաղորդել՝ իր ռազմական քաղաքականությամբ։ Այսինքն՝ իրենց դիրքորոշումը պարտադրելու մոտեցումն է։ Այս մասին «Փաստինֆո»-ի հետ զրույցում ասաց քաղաքագետ Հրանտ Մելիք-Շահնազարյանը։

Հիշեցնենք, որ սեպտեմբերի 27-ից Ադրբեջանի ռազմական ագրեսիայի հետևանքով փաստացի պատերազմ է ընթանում։ Թեև հոկտեմբերի 10-ին՝ ժամը 12-ից հումանիտար հրադադար հայտարարելու մասին Մոսկվայում Հայաստանի, Ռուսաստանի ու Ադրբեջանի արտգործնախարարների ձեռք բերած պայմանավորվածությանը, Ադրբեջանը շարունակում է լայնածավալ գրոհը սահմանագծի ամբողջ երկայնքով։ Այսօր՝ հոկտեմբերի 14-ին ՌԴ ԱԳՆ նախարար Սերգեյ Լավրովը լրագրողների հետ զրույցում հայտնեց, որ բանակցային սեղանին է գտնվում ԵԱՀԿ ՄԽ կողմից առաջարկվող փուլային տարբերակը, այն է՝ տարածքների վերադարձ, ապա հետո միայն կարգավիճակի հստակեցում։

Փաստացի պատերազմի պայմաններում փուլային տարբերակի շրջանառության վերաբերյալ պաշտոնական Երևանը դեռևս մեկնաբանություն չի տվել։ «Փաստինֆո»-ի հետ զրույցում քաղաքագետ Հրանտ Մելիք-Շահնազարյանը նշեց, որ հայկական կողմը մշտապես հերքում էր բանակցային պրոցեսի կամ որևէ պայմանավորվածության առկայությունը և հայտնի չէ, թե պաշտոնական Երևանը ո՞ր չափով է դրան համաձայնվել և որ չափով չի համաձայնել, սակայն փաստն այն է, որ պատերազմին զուգընթաց փորձում են ակտիվացնել բանակցային պրոցեսը և հայտնի է, թե ինչ կանոնների մասին է խոսքը։

Նրա խոսքով՝ ադրբեջանցիները տեսել, ենթադրել կամ կասկածել են, որ հայկական կողմը փորձում է ժամանակ ձգել, պայմանավորվածություններից ետ կանգնել, ուստի՝ փորձել են պատերազմի միջոցով հարցը լուծել։

Փաստ է, որ հարձակվող կողմն Ադրբեջանն է եղել, և, եթե Լավրովը ճիշտ է ասում և կողմերն աշխատել են այդ փաստաթղթի շուրջ, ուստի քաղաքագետը կարծում է, որ դա ձեռնտու կլիներ Ադրբեջանին, ընդ որում՝ Լավրովի հայտարարության մեջ ևս ասված է, որ առաջնագծում գործընթացները կարագացնեն, կնպաստեն պայմանավորվածությունների ի կատար ածելուն։

«Նշանակում է, որ այս պահին հայկական կողմին զենքի ուժով պարտադրվում է որոշում, որն ակնհայտորեն չի բխում մեր շահերից»,- նշեց քաղաքագետը՝ հավելելով, որ պատերազմի ժամանակ պետք է պատերազմել և ամեն կերպ փորձել հաջողությունների հասնել։

Ինչ վերաբերում է դիվանագիտական դաշտում աշխատանքներին, քաղաքագետը նշեց, որ այս պահին մեկ խնդիրը ադրբեջանական ագրեսիայի կանխումն է, մյուս խնդիրը՝ այդ ագրեսիայի հետևանքների չեզոքացումն է։

Աղբյուր` Փաստինֆո