Փաստ ինֆո

Հայաստանն այսօր գործ ունի ահաբեկչական պետությունների հետ, դա ակնհայտ է ՝ թե՛ Թուրքիան, թե՛ Ադրբեջանը ահաբեկչական պետություններ են,- «Փաստինֆո»-ի հետ զրույցում արձանագրում է ՀՀ նախկին վարչապետ Խոսրով Հարությունյանը՝ նկատելով, որ հրադադարի լիակատար պահպանումը չի բխում նախևառաջ Թուրքիայի շահերից:

Ինչպես արդեն տեղեկացրել ենք՝ սեպտեմբերի 27-ի վաղ առավոտյան Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում է նաեւ Թուրքիան, վարձկան-ահաբեկիչներ՝ Սմերչ, Պոլոնեզ, թուրքական Կասիրգա եւ այլ կասետային զինատեսակներով հրթիռակոծելով խաղաղ բնակավայրերը, այդ թվում մայրաքաղաք Ստեփանակերտը։ ՀՀ ԱԳՆ-ն հայտարարել է, որ Արցախի ժողովուրդը մարտնչում է թուրք-ադրբեջանական դաշինքի դեմ ու ընդգծել՝ Թուրքիան հավաքագրում է օտարազգի ահաբեկիչ զինյալների և տեղափոխում նրանց Ադրբեջան։

ՌԴ նախագահի նախաձեռնությամբ Մոսկվայում հոկտեմբերի 9-ին կայացավ ՀՀ, ՌԴ և Ադրբեջանի ԱԳ նախարարների հանդիպումը եւ 11 ժամ տեւած բանակցությունների արդյունքում հոկտեմբերի 10-ին պայմանավորվածություն ձեռք բերվեց հումանիտար հրադադար հաստատելու մասին՝ ռազմագերիների և զոհված զինծառայողների մարմինների փոխանակման նպատակով: Սակայն Ադրբեջանը խախտեց այն՝ շարունակելով ակտիվ ռազմական գործողությունները սահմանի ամբողջ երկայնքով՝ թիրախավորել Արցախի խաղաղ բնակավայրերը:
Մեզ հետ զրույցում նախկին վարչապետ Խոսրով Հարությունյանը նկատեց, որ սա իր հետևանքներն է ունենալու ռուս-ադրբեջանական հարաբերությունների վրա, ինչի մասին վկայում է նաև վերջին շրջանում արդեն ՌԴ ՊՆ Սերգեյ Շոյգուի ակտիվ միջամտությունը.

«Ռուսաստանի ռազմաքաղաքական ղեկավարությունը աստիճանաբար զգացնել է տալիս, որ Ադրբեջանը ոչ միայն չի հարգել Մոսկվայում ձեռք բերված պայմանավորվածությունը, նաև չի հարգում ՌԴ նախագահի նախաձեռնությունը, հակասում է Ռուսաստանի միջնորդական առաքելության արդյունավետությանը, պատահաբար չէ, որ ակտիվ բանակցությունների մեջ է մտել նաև Ռուսաստանի պաշտպանության նախարար Շոյգուն,որն ակտիվ աշխատում է Հայաստանի, Ադրբեջանի և Թուրքիայի իր գործընկերների հետ:Սա խոսում է այն մասին, որ քննարկվում են այնպիսի քայլեր, որոնք կստիպեն ադրբեջանաթուրքական տանդեմին հաշվի նստել այն պայմանավորվածությունների հետ, որոնք ձեռք են բերվել Մոսկվայում:Երկրորդ՝ ես կարծում եմ, միջազգային հանրությունը ավելի կակցենտավորի այն թեզը, որ նույնիսկ սեփական զինվորների դիերը մարտի դաշտից հանելու նախաձեռնությունը Ադրբեջանը խոչընդոտում է։ Այսինքն, սա, ինչ-որ կերպ, նաև ձևավորում է Ադրբեջանի քաղաքական ղեկավարության դիմանկարը և սրանից, կարծում եմ, Ադրբեջանի գործընկերները հետևություններ կանեն:Չի կարող մի երկրի ղեկավար, որի վարքագծում մենք հումանիզմի որևէ տարր չենք տեսնում, համարվել վստահելի գործընկեր։

Ավելին՝ դա ահաբեկչական պետությանը բնորոշ վարքագիծ է, ահաբեկիչներն են, որ հաշվի չեն առնում հումանիտար արժեքները»,- նշեց զրուցակիցը:

Վերջինիս հավաստմամբ՝ հրադադարի պահպանումը չի բխում Թուրքիայի շահերից, և քանի որ Թուրքան տարածաշրջան է բերել բավական տպավորիչ քանակությամբ գրոհայիններ, նրանց առկայությունը ստիպելու է ճնշումներ գործադրել Ադրբեջանի իշխանությունների վրա,մյուս կողմից՝ փորձելու է հասնել նրան, որ բանակցեն ոչ թե Հայաստանի կամ Ադրբեջանի, այլ՝ իր հետ:

«Առաջին իսկ օրը, երբ խոսք գնաց հումանիտար հրադադարի մասին, ես հրապարակավ հայտնել եմ, որ այն չի կայանա, քանի որ դա չի բխում Թուրքիայի շահերից: Ադրբեջանը այսօր քաղաքական որոշումներ կայացնող չի, այսօր որոշումներ կայացնում են Անկարայում:

Թուրքիան ցանկանում է այնպես անել, որ բանակցեն իր հետ՝ այլ ոչ Հայաստանի կամ Ադրբեջանի:

Սա Թուրքիայի ամենամեծ ցանկությունն է, որով կարձանագրվի նրա քաղաքական, ռազմական կամ աշխարհաքաղաքական ներկայությունը Անդրկովկասում: Սա է պատճառը, որ Թուրքիան չի կանգնելու, հատկապես, որ ինքը կորցնելու ոչինչ չունի՝ ոչ մարդկային, ոչ ռազմական։ Զոհվում են ադրբեջանցիներ, բայց իր նպատակին փորձում է հասնել Թուրքիան: Բոլոր դեպքերում Թուրքիան շահելու է այս առճակատումից: Եթե վաղը Ադրբեջանում հակաիշխանական ցույցեր լինեն, հասարակական կյանքը ցնցումների մեջ լինի, Թուրքիան մի վայրկյան անգամ չի հապաղի Ալիևին զոհ տալու, կարող ենք արձանագրել, որ Ադրբեջանը Թուրքիայի վիլայեթներից մեկն է, մեկ ազգ՝ երկու պետություն թեզը պատահաբար չի շրջանառվում»,- նշեց զրուցակիցը:

Անդրադառնալով Թուրքիայի նախաձեռնությամբ ռազմական գործողություններում նաև վարձկանների ակտիվ ներգրավմանը, Խոսրով Հարությունյանը նկատեց, որ սա սպառնալիք է ոչ միայն Հայաստանի, այլ՝ ողջ տարածաշրջանի, ինչպես նաև՝ Եվրոպայի համար, և որ վարձկանները ծառայելու են բացառապես Թուրքիայի նպատակներն իրականացնելու համար.

«Վարձկաններն այստեղ չեն , որ միայն կռվեն Արցախի դեմ, նրանք ավելի հեռու գնացող նպատակներ ունեն տարածաշրջանում: Վերջին հաշվով, 2016 թվականից վարձկանները դարձել են Թուրքայի ռազմական համակարգի բաղկացուցիչ մաս, նրանք ֆինանսավորվում են Թուրքիայի կողմից և անկախ նրանից՝ ինչպես կավարտվի պատերազմը, վարձկանները մնալու են տարածաշրջանում և օգտագործվելու են Թուրքիայի նպատակներին հասնելու համար, այդ վարձկանները նաև հարամելու են Ադրբեջանի հասարակության կյանքը և զբաղվելու են թալանով, չեն բավարարվելու դրանով, կմտնեն նաև Վրաստան և Վրաստանը պետք է դա հասկանա:Հետագայում այդ վարձկանները հայտնվելու են նաև Եվրոպական երկրներում՝ ԵՄ անդամ պետությունները պետք է հասկանա դա սակայն ցավոք, միջազգային հանրության շրջանում, բացի հայտարարություններից, գործնական քայլեր չեմ նկատում»,- ասաց զրուցակիցը:

Վերջինս նաև նկատեց, որ Երևանը այժմ փաստարկված միջազգային հանրությանը ներկայացնում է, որ վարձկանների մասնակցությունները սպառնալիք է տարածաշրջանի կայունության պահպանման համար և մեր ԱԳՆ խողովակներով այդ աշխատանքը շատ ակտիվ տարվում։

Աղբյուր` Փաստինֆո