Փաստ ինֆո

«Առավոտյան շուտ էր՝ կրակոցից արթնացանք։ Էրեխեքը դուրս թռան՝ արդեն պայթյուն, ծուխ։ Էրեխեքը վախից ձենները գցել էին, մեծերի համար արդեն սովորական է՝ 92-ից դա ենք տեսել,-«Փաստինֆո»-ի հետ զրույցում պատմում է Արցախից Հայաստանում ժամանակավորապես ապաստան գտած կինը, որը չորս երեխաների հետ արդեն մի քանի օր գտնվում է Աբովյան քաղաքում։ Վերջինս նշում է՝ ապրիլյան քառօրյայից հետո չէինք սպասում, չէինք էլ պատկերացնում, որ սենց բան կլիներ։ Ամուսինս Մարտակերտում մնաց, ինձ երեխաների հետ հանեց։ Գյուղի վերջին ընտանիքն էինք մնացել, բոլորն արդեն դուրս էին եկել, բայց ամուսինս ասում էր, որ մենք գյուղը չենք թողնելու։ Դպրոցի նկուղում էինք ապրում, բայց որ տեսավ երեխաներն արդեն շատ են վախենում անընդհատ ռմբակոծություններից, մեզ հանեց։ Անտանելի պայթյուններ էին, տան պատերից սկսած դղրդում էր»,- պատմում է Մարտակերտցի կինն ու ասում է՝ անհամբեր սպասում են հաղթանակի լուրին, որ տուն վերադառնան։

Ինչպես արդեն տեղեկացրել ենք՝ սեպտեմբերի 27-ի վաղ առավոտյան Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում է նաև Թուրքիան, վարձկան-ահաբեկիչներ՝ Սմերչ, Պոլոնեզ, թուրքական Կասիրգա և այլ զինատեսակներով հրթիռակոծելով խաղաղ բնակավայրերը, այդ թվում մայրաքաղաք Ստեփանակերտը։ ՀՀ ԱԳՆ-ն հայտարարել է, որ Արցախի ժողովուրդը մարտնչում է թուրք-ադրբեջանական դաշինքի դեմ ու ընդգծել՝ Թուրքիան հավաքագրում է օտարազգի ահաբեկիչ զինյալների և տեղափոխում նրանց Ադրբեջան։ Հայաստանում և Արցախում սեպտեմբերի 27-ին հայտարարվել է ռազմական դրություն և ընդհանուր զորահավաք։

Մանրամասները՝ տեսանյութում

Հեղինակ՝ Նվարդ Մանվելյան

Աղբյուր` Փաստինֆո