Փաստ ինֆո

«Երբ մարտական գործողությունները սկսվեցին, մնացինք գյուղում՝ Դրմբոնում։ Տանն էինք, մեր առօրյա գործով էինք զբաղված։ Թոշակառու եմ, արդեն պետք է թոշակի գնայի, թղթերս էի դասավորում, բայց կիսատ մնաց։ Հայաստան տեղափոխվելուց մի օր հետո իմացա, որ տղաս զոհվել է, նորից վերադարձա Արցախ։ Մյուս տղաս, թոռս, երկու փեսաս, քրոջս տղաները, եղբայրներս մնացել են այնտեղ՝ կռվում են։ Հայաստան ենք տեղափոխվել երկու հարսներիս, մանկահասակ թոռներիս հետ։ Սպասում ենք, տեսնենք ի՞նչ է լինում, հետ գնանք մեր տուն, ուզում ենք հետ գնանք»,- պատմում է օրեր առաջ մարտական գործողություններում որդուն կորցրած արցախցի կինը։ 

Կնոջ հարսը, ով մանկահասակ երեխաների հետ նույնպես ժամանակավոր կացարան է գտել Հայաստանում պատմում է՝ երեխաները կրակից սարսափելի վախեցել են.«Պատրաստվում էի երեխաներին դպրոց ուղարկել, շատ անսպասելի կրակոցները սկսեցին։ Գյուղապետը արագ հավաքեց բոլորիս գյուղի մեջ ու ասաց՝ մի մարդու պես մեքենաներ ենք գտնում ու կանանցով, երեխաներով և մեծահասակներով հեռանանք գյուղից, որովհետև ամենուրեք ռմբակոծում են։ Չորս երեխա ունեմ, մեծ տղաս արդեն մեկ ամսից ավել է՝ ծառայության մեջ է։ Չենք էլ հասցրել իրեր վերցնել։ Հազիվ կարողացա գրկի երեխաներիս շորերը վերցնեմ։ Ինչ ընկավ ձեռքիս տակ, դրանք էլ վերցրի ու մեզ բերեցին Հայաստան»,- պատմում է Արցախից ժամանակավորապես Հայաստան տեղափոխված դրմբոնցի բազմազավակ մայրը։

Ինչպես արդեն տեղեկացրել ենք՝ սեպտեմբերի 27-ի վաղ առավոտյան Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում է նաև Թուրքիան, վարձկան-ահաբեկիչներ՝ Սմերչ, Պոլոնեզ, թուրքական Կասիրգա և այլ զինատեսակներով հրթիռակոծելով խաղաղ բնակավայրերը, այդ թվում մայրաքաղաք Ստեփանակերտը։ ՀՀ ԱԳՆ-ն հայտարարել է, որ Արցախի ժողովուրդը մարտնչում է թուրք-ադրբեջանական դաշինքի դեմ ու ընդգծել՝ Թուրքիան հավաքագրում է օտարազգի ահաբեկիչ զինյալների և տեղափոխում նրանց Ադրբեջան։ Հայաստանում և Արցախում սեպտեմբերի 27-ին հայտարարվել է ռազմական դրություն և ընդհանուր զորահավաք։

Մանրամասները՝ տեսանյութում

Հեղինակ՝ Նվարդ Մանվելյան

Աղբյուր` Փաստինֆո