Փաստ ինֆո

«Շատ դժվար ապրուստ է... Տղաներիս, թոռներիս թողել եմ մի ուրիշ տեղ, ես եկել եմ այստեղ,- սրտնեղած ասում է հրետակոծությունից մի կերպ մազապուրծ, կնոջ ու մանկահասակ թոռների հետ Արցախից Հայաստան տեղափոխված տարեց բնակիչը «Փաստինֆո»-ի հետ զրույցում և հավելում՝ տանը՝ առօրյա գործերով էին զբաղված, ոչինչ չէր հուշում, որ առավոտը պատերազմով է բացվելու։ Հիմա էլ սպասում են խաղաղության, որ շտապ վերադառնան իրենց տներին ու հողին տեր կանգնեն։ 

Աբովյան քաղաքում ապաստանած մեծ թվով արցախցի երեխաների համար զբաղմունք կա՝ «Փաստինֆո»-ի նկարահանման օրը երեխաները մի քանի մեծահասակների ուղեկցությամբ գնում էին էքսկուրսիա՝ այցելության Խնկո Ապոր գրադարան, այնտեղից էլ՝ զբոսանք Երևանում։ Մինչ մեկնելը արցախցի մի դպրոցական պատմում է՝ ինչպես սկսվեց պատերազմը.«Առավոտյան տատիկս մեզ քնից արթնացրեց, իմացանք, որ կռիվը սկսել է։ Սկզբից մտածեցինք, թե փորձեր են, բայց հասկացանք, որ չէ՝ իսկական կրակոցներ են։ Ապահովության համար մեզ բերեցին Հայաստան։ Այստեղ մեզ շատ լավ են նայում։ Այսօր էլ գնում ենք գրադարան, այնտեղ մեզ համար հետաքրքիր և ուրախ միջոցառում են կազմակերպել։ Մեզ շատ լավ ենք զգում այստեղ, բայց մեկ է՝ մեր տունն ենք ուզում, կարոտել ենք արդեն»,- պատմում է Արցախից Աբովյան քաղաքում պատսպարված դպրոցահասակ տղան։

Ինչպես արդեն տեղեկացրել ենք՝ սեպտեմբերի 27-ի վաղ առավոտյան Ադրբեջանը ռազմական ագրեսիա է ձեռնարկել Արցախի շփման գծի ամբողջ երկայնքով, որին մասնակցում է նաեւ Թուրքիան, վարձկան-ահաբեկիչներ՝ Սմերչ, Պոլոնեզ, թուրքական Կասիրգա եւ այլ զինատեսակներով հրթիռակոծելով խաղաղ բնակավայրերը, այդ թվում մայրաքաղաք Ստեփանակերտը։ Ընդհանուր առմամբ հրթիռակոծության թիրախ է դարձել 120 բնակավայր։

ՀՀ ԱԳՆ-ն հայտարարել է, որ Արցախի ժողովուրդը մարտնչում է թուրք-ադրբեջանական դաշինքի դեմ ու ընդգծել՝ Թուրքիան հավաքագրում է օտարազգի ահաբեկիչ զինյալների և տեղափոխում նրանց Ադրբեջան։Հայաստանում եւ Արցախում սեպտեմբերի 27-ին հայտարարվել է ռազմական դրություն և ընդհանուր զորահավաք։

Մանրամասները՝ տեսանյութում

Հեղինակ՝ Նվարդ Մանվելյան

Աղբյուր` Փաստինֆո