Փաստ ինֆո

Վարչապետը տեղեկացրել է ստեղծված իրավիճակի մասին, գնահատականներ է ներկայացրել իրավիճակի և տարբեր կողմերի գործողությունների վերաբերյալ։ ՀՀ վարչապետ Նիկոլ Փաշինյանի հետ հանդիպումից հետո լրագրողների հետ զրույցում ասել ՀՀ-ում ՌԴ դեսպան Սերգեյ Կոպիրկինը։

«Նաև շնորհակալություն է հայտնել Մինսկի խմբի համանախագահներին, ՌԴ նախագահին ՝ այն ջանքերի համար, որոնք գործադրվում են կրակի դադարեցման համար»,- ասաց դեսպանը՝ ներկայացնելով վարչապետի հետ հանդիպման մանրամասները։

Դիտարկմանը, որ հումանիտար հրադադարի ռեժիմը չի պահպանվում, Կոպիրկինը նշեց, որ պետք է հասնել նրան, որ դա արվի այնպես, ինչպես կողմերը պայմանավորվել են Մոսկվայում և ռուսական կողմից արվում է ամենը, որ այդ ռեժիմն իսկապես գործի։ Կոպիրկինը նշեց, որ կոնտակտի մեջ են գտնվում բոլոր կողմերի հետ։

Հարցին՝ արդյո՞ք Արցախի անկախության ճանաչման հարցը քննարկվել է վարչապետի հետ հանդիպման ժամանակ և ինչ դիրքորոշում ունի ՌԴ-ն, դեսպանը պատասխանեց, որ Ռուսաստանի դիրքորոշումն այն է, որ անհրաժեշտ է դադարեցնել ռազմական գործողությունները, որ չզոհվեն մարդիկ, անհրաժեշտ է վերադառնալ բանակցությունների սեղան և բանակցել այն ձևաչափով, որն այժմ գործում է։

Նա նաև տեղեկացրեց, որ խաղաղապահների վերաբերյալ հարց չի քննարկվել վարչապետի հետ հանդիպման ժամանակ։ Անդրադառնալով վիրավորում ստացած ռուս լրագրողի առողջական վիճակին՝ Կոպիրկինը նշեց, որ, որքանով հասկանում է, դրական դինամիկա կա, սակայն վիրավորումը ծանր է, «Էրեբունի» ԲԿ-ի ղեկավարության հետ սերտ կապերի մեջ է գտնվում։

Աղբյուր` Փաստինֆո