Փաստ ինֆո

Մոտ ապագայում վարչապետը կդիմի հանրությանը և ինֆորմացիա կտրամադրի ստեղծված իրավիճակի վերաբերյալ։ Այս մասին լրագրողների հետ զրույցում ասաց ԱԺ փոխնախագահ Ալեն Սիմոնյանը։

«Կան ինչ-որ բաներ, որոնք պետք է հստակեցվեն։ Գիտեք, որ մենք մշտապես բաց ենք եղել և որոշվել է, որ նույնիսկ այս պարագայում մենք մաքսիմալ մեր հանրության հետ բաց ենք լինելու, որովհետև վստահությունը, փոխադարձ կապը շատ կարևոր է այսօր, պատերազմի իրավիճակում»,- ասաց նա՝ հավելելով, որ հասարակությունը պետք է տեղեկացված լինի, քանի որ այսօր դաշտում շատ ֆեյք ինֆորմացիա է լցված՝ սկսած անձնականից, վերջացրած պատերազմական որոշակի անձանց հետ կապված։

Նրա խոսքով՝ թուրքը, ադրբեջանցին աշխատում է ոչ միայն սահմանում, այլև՝ համացանցում։ Սիմոնյանը նշեց, որ հրաժարականի մասին հիմար ստեր տարածողները պատժվելու են և այսօր արդեն երեք էջ ունեցող հեղինակ բացահայտվել է և պատասխանատվության է ենթարկվելու և հորդորեց քաղաքացիներին՝ չհավատալ այդ ամենին։

ԱԺ փոխնախագահի խոսքով՝ խաղաղապահների ներգրավման հարց չի քննարկվել, նման քննարկման ներկա չի եղել, եղել են միայն ակնարկներ, խոսակցություններ։

Ինչ վերաբերում է հայ-ռուսական հարաբերություններին, Սիմոնյանը նշեց, որ այսօր մեր և ՌԴ հարաբերությունները գտնվում են ամենաբարձր մակարդակում և համագործակցությունը, փոխըմբռնումը, իրավիճակի սթափ գնահատումը կա բոլոր գործընկերների հետ, այդ թվում՝ ՌԴ-ի հետ։
Ինչ վերաբերում է Արցախի անկախության ճանաչմանը՝ Սիմոնյանը նշեց, որ պետք է հասկանալ դրա նպատակահարմարությունը, տեխնիկապես իրագործումը և դրա հետևանքները, հետագա գործողությունները։

«Պարզ է, որ անկախացումը բոլորիս համար ամենակարևոր հարցն է։ Գիտեմ, որ մենք բոլոր ուղղություններով, նաև մեր գործընկերների հետ աշխատում ենք այդ ուղղությամբ, գնալու ենք և գնում ենք Արցախի ճանաչման ճանապարհով, նույնիսկ՝ ամենացածր մակարդակում շփումների մեջ մենք այդ հարցը բարձրացնում ենք »,- ասաց Սիմոնյանը՝ կարևորելով, որ Արցախը ճանաչվի ոչ միայն Հայաստանի, այլև՝ աշխարհի կողմից, որին կհետևի իրավական քայլեր։

Անդրադառնալով բանակցություններին՝ Սիմոնյանը նշեց, որ հրապարակվել է փաստաթուղթ՝ հենց Լավրովի կողմից, որտեղ կա քայլերի հերթականությունը և այսօր պետք է հասնել նրան, որ այն լայնամասշտաբ հարձակումը, որը կարողացել ենք զսպել, կանգնեցնենք և անցնենք այլ կետերի իրագործմանը՝ մեր կողմից հայտարարված վերջնական նպատակին հասնելուն ուղղված գործողություններն իրականացնելով։

Աղբյուր` Փաստինֆո